1 Denga huaadangada alodahi, nnoho mai hagalaangona de mee nei;

alodahi e nnoho i henua i lalo, goodou hagalaangona;

2 go de gau maolalo ma de gau maolunga,

de gau lava ma de gau hagaau aloha.

3 Au e tala muna heiangi;

gai maanadu mai i ogu lodo e hai gi tonu ange dangada.

4 Au e huli ange e hagallongo dahi muna hagasengasenga;

au e hagadonu dagu mee hagasengasenga i dagu harp:

5 Gu aha gu madagu ai au i de masavaa hai ngadaa,

ma de masavaa o de gau baubau e duuli ai au —

6 go dangada e tali hagalodolodo ange gi olaadeu lava

aama de tuhi delaadeu llava mmao?

7 Ni muna abodonu, e deai se dangada e maua i de hagaola dahi dangada gee,

aabe go de hagao ange de Maadua e hagaola ai dono mouli,

8 go hiidinga de hagaoanga o de mouli e hagao ngadaa mmao,

e dee maua donu i de hagao gi odi ange,

9 gi maua ai e ia i de mouli ga hano ai, maa tee gidee de magau.

10 Gai ia e gidee bolo tangada heiangi e magau,

gai e bei ai hogi tangada lodo senga ma tangada e deai ana mee e iloo,

gai gilaau e dugu ange olaau goloa lagolago gi hanu dangada gee.

11 Gai olaadeu daanunga go olaadeu hale ga hano ai,

gai go olaadeu mommee nnoho i denga atangada alodahi,

e dee galemu gilaadeu gu gaavange olaadeu ingoo gi olaadeu alahenua.

12 Aagai ga lava naa donu tangada, gai ia e dee maua gi mouli ga hano ai,

gai ia e magau naa bei dagodo o manu dolodolo.

13 Deenei tagodo o dangada e hagadonusia donu huu gilaadeu,

ma dangada e malangilangi i olaadeu goloa lagolago.

14 Gilaadeu gu paba ange laa e daa gi maakau bei dagodo o denga ssiibi;

de magau e hagaloosi ange gilaadeu.

Aagai de gau heohi e hagadee kii naa gilaadeu i taiao;

olaadeu angaanga e pobo naa i lo te daanunga,

gilaadeu gu mmao gee mai i olaadeu hale danuaa.

15 Aagai de Maadua e hagaola mai au i de mommee o de gau maakau,

ia e kave naa au gi noho i ono daha.

16 Koe gi dee manavasaa i de lava o dahi dangada,

ma de masavaa e hagadagadaga age ai de mahamaha o dono hale.

17 Go hiidinga e deai donu sana mee daudahi e kave madali ia i dono magau;

gai dono lava*dono lava, aabe go dono mahamaha. e dee maua donu i de kave madali ia.

18 Dono masavaa e mouli ai gai ia e maanadu bolo ia se dangada manuuia —

gai dangada e tuhi goe i doo hagadagadaga age —

19 aagai ia e magau naa bei atangada o ono dubuna madagidagi,

gai gilaadeu e dee gidee ange naa donu de maalama.

20 Tangada lava, gai e dee donu ange,

e bei donu huu denga manu dolodolo e maakau laa.