1 De Maadua Mmahi Mmao laa, go Iahweh

e basa ma de hagahi henua i lalo

mai i de sobo age o de laa ga dae ai gi de danu.

2 De maalama o de Maadua e hagaago mai i Zion,

go de aduhale e honu abodonu dono mahamaha.

3 Taadeu Maadua e humai, gai ia e dee noho naa donu huu ga dee muu;

de ahi e dudu mee alodahi i ono mada i mua,

gai de madangi mmahi e ssau ma e duuli ai ia.

4 Ia e hagahi de langi i lunga ma henua i lalo,

gai ia ga hagamodu ai muna o ono dangada:

5 “Hagabuni ina mai ogu dangada e hai hegau i de muna abodonu,

go gilaadeu ne haia dahi hagatoo donu hagaheloongoi madali au

ga hagasauaa i dahi ssigidaumaha.”

6 De langi e hagaago mai de heohi o de Maadua,

i hiidinga go ia donu de ia hagamodu muna!

7 “Ogu dangada, goodou nnoho mai hagalaangona, gai au ga basa adu,

Israel, au e hagabaubau oo dagodo.

Go au de Maadua, doo Maadua.

8 Au e dee hagasee goe i hiidinga o au sigidaumaha,

aabe go au sigidaumaha dudu, e gaamai gi de au i masavaa alodahi.

9 Au e dee malangilangi i dahi kaau daane mai i doo hale,

aabe go dahi guudi mai i lodo au buibui manu.

10 Go hiidinga manu lodo henua alodahi niiagu,

gai niiagu denga manu i honga duuduu lagolago.

11 Au e iloo denga manu llele alodahi i honga denga mounga,

gai manu alodahi e nnoho saele i honga de gelegele niiagu.

12 Noo au gu hiigai, gai au e dee tala adu gi de goe,

go hiidinga henua i lalo ma mee alodahi iai niiagu.

13 Au e dee gai kano o denga kaau,

aabe unu dodo o denga guudi.

14 Hagaahe ange de abodonu gi de Maadua i ssigidaumaha,

koe gi hagassula ina au hagatoo donu ange gi de Ia Maolunga Mmao laa,

15 ma de hagahi mai au i de masavaa o de hai ngadaa

gai au ga hagaola ai goe, gai koe ga hagamahamaha ai au.”

16 Aagai de Maadua e hai ange gi tangada baubau:

“Goai ne dugu adu koe gi hagamaumau ina agu hainga,

aabe go de tala dagu hagatoo donu hagaheloongoi?

17 Koe e kino i dagu hagaheohi adu goe,

gai koe e dee anga ange gi agu muna.

18 Noo koe e gidee dahi dangada gaiaa, gai koe e hai soa ange gi de ia,

koe e hagabuni ange gi de gau dagodo haisala.

19 Doo ngudu e abo i de tala mee baubau,

gai doo alelo e honu i de daahanga dangada.

20 Koe e duudagi huu de hai baasi ange gi doo daina;

ma de hagabaubau tama daane a doo dinana donu.

21 De masavaa aau ne hai ai mee nei, gai au tee muu adu donu;

gai koe e maanadu bolo au e bei oo dagodo.

Aagai iainei au e hagasee goe,

ma de hagabaubau goe.

22 Goodou gu ngalo laa de Maadua, hagasaelea de mee nei,

au kana hangahanga goodou, gai gu deai e maua i de hagaola goodou.

23 Tangada e haia de hagaahe mai de abodonu go dana sigidaumaha e hagadubu au,

gai au e hagaago ange gi tangada e seesee i de heohi de hagaola a de Maadua.”