55
Ange gi tagi o taahili; e hua madali denga mee hagadangidangi iai daula. Se Maskil nii David
1 De Maadua, hagalaangona dagu dalodalo,
koe gi dee hagangadi mee ina dagu dangidangi!
2 Anga mai ma gi basa mai gi dagu dalodalo;
au gu kona mmao dogu hai ngadaa.
Gai gu dee baba mmao ogu lodo
3 i muna a ogu hagadaumee, ma mee hagadaemaha a de gau baubau.
Gilaadeu e hagahai ngadaa dogu mouli,
gai e vaivai hai au i delaadeu kino i de au.
4 Au gu kona mmao de manavasaa ogu lodo,
gai denga mee hagamaatagu o de magau gu paa mai gi de au.
5 Au gu madagu ma de bolebole;
de mee hagamaatagu gu hagamadagu au.
6 Gai au e hagadaba, “Mee naa gi hanu ogu bakau bei dahi manu kono!
Gai au ga lele e hano e hagamabu;
7 au e hano naa gi dahi mommee mmao,
au e hano naa ga noho i de vao.
Selah
8 Au e hagamoolau e hano gi dogu mommee buibui,
gi mmao gee ai au i de madangi ssau ma de mmahi.”
9 Dogu Ia Aamua, haia gi dee heloongoi de gau baubau,
go hiidinga au gu gidee de vaivai haia o dangada ma de hebagi i lo te aduhale.
10 Gilaadeu e hagadaga saele i de laangi ma de boo i honga de buibui o de aduhale;
de baubau ma de hai ngadaa gu i lo te aduhale.
11 Gu maoha mee alodahi i lo te aduhale;
mee hagamaatagu ma denga muna hhadu gu dagodo i honga ono haiava.
12 Noo au e hagadogaa ina i daho tangada e kino i de au,
gai au e maua donu i de golomagi ogu lodo;
noo se hagadaumee e hagamaolunga i de au,
gai au e maua i de mmuni i de ia.
13 Aagai go koe, dahi dangada e bei ogu dagodo,
se dangada e iloo au, gai se soa donu niiogu —
14 i mua gai gimaadeu e dee modu de hagabuni ga madaangudu;
gai gimaadeu ne hagabuni ga seesee gi de hale o de Maadua.
15 Mee naa gi moolau delaadeu maakau;
gai gi mouli ga hulo ai gi de mommee o de gau maakau;
de baubau e dagodo i olaadeu mommee nnoho ma olaadeu lodo!
16 Aagai au e hagahi de Maadua;
gai Tagi Maolunga ga hagaola ai au.
17 De ahiahi, taiao aama de hualaangi gai au e dangidangi i de duasala ogu lodo,
gai ia ne hagallongo dogu dangi.
18 Ia e hagaola mai au i de hai ngadaa
ma gilaadeu e hebagi mai gi de au,
go hiidinga e soa donu e hai baasi mai gi de au.
19 Gai de Maadua gu hodooligi laa mai madagidagi,
ia e langona, ga hagaduasala gilaadeu;
Selah
go hiidinga gilaadeu e dee llodo donu e sui,
gai e dee maatagu i de Maadua.
20 Dogu soa gu hai baasi ange gi ono soa donu,
gai ia gu oha dana hagatoo donu hagaheloongoi.
21 Ana muna e segesege bei denga kiliisi,
aagai ono lodo e maanadu de hebagi;
ana muna e ssali ngaohie ange i lolo,
aagai e bei donu de gadilaasa kangi gu dada mai laa e tuu ai dahi mee.
22 Hagauda ina ange oo daemaha gi honga o Tagi Maolunga,
gai ia ga bale adu goe;
ia e dee dugu ange naa donu tangada heohi gi baguu.
23 Aagai koe, de Maadua, e tili iho naa de gau baubau
gi lo te geelonga o de gau maakau;
gai de gau daa dangada ma de daahangadia dangada
e dee maua naa donu gi madohi lua olaadeu laangi e mouli ai.
Aagai au e hagadonusia goe.