56
Ange gi tagi o taahili; e hua bei de leo o “De manu kono i honga denga oak i de mommee mmao”. Se Miktam nii David, i de masavaa o de gau Philistia ne poo ai ia i Gad
1 De Maadua, abodonu mai gi de au,
i hiidinga dangada e llodo e vaivai hai au;
gilaadeu e hebagi mai gi de au i laangi alodahi.
2 De gau hagabaubau dangada e doolohi au mai i taiao ga boo ai;
gai e soa dangada e hebagi mai gi de au i delaadeu hagamaolunga.
3 De masavaa oogu e madagu ai,
gai au e hagadonusia goe.
4 Au e tuhi de Maadua i hiidinga ana muna,
au e hagadonu de Maadua; au e dee madagu donu.
Gai ni aha naa a dahi dangada e maua i de hai mai gi de au?
5 Mai i taiao ga boo ai gai gilaadeu e hagadee heohi agu muna;
gilaadeu e hagatau delaadeu hai e hagammae ai au.
6 Gilaadeu e hagabuni ma e nnoho ai, gilaadeu e mmuni.
Gilaadeu e mulidagi agu mee e hai;
gilaadeu e llodo mmao e kave dogu mouli.
7 Koe e dee dugu ange gilaadeu gi ola, i hiidinga olaadeu baubau;
de Maadua, koe gi hagaduasala ina denga huaahenua i doo bole!
8 Koe e daohi ogu hanonga e silivaahea saele ai,
ma de hhao ogu loimada gi lo tau manu hao vai.
E aha, e dee gu lava laa i de sisi ma gu daohi mee nei?
9 Ogu hagadaumee e saavini naa ga hulo gee
i de masavaa aagu e hagahi ai goe gi balea mai au.
Deenei dagu hai e iloo ai bolo de Maadua e bale mai au.
10 Au e tuhi de Maadua i hiidinga o ana muna,
au e tuhi Tagi Maolunga i hiidinga o ana muna;
11 au e hagadonusia de Maadua; au e dee madagu donu.
Gai se aha naa donu a dahi dangada e maua i de hai mai gi de au?
12 De Maadua, au e hagasula naa donu agu mee gu hagatoo donu adu ai gi de goe;
au e gaavadu naa gi de goe ssigidaumaha e hagaahe adu ai de abodonu gi de goe.
13 Gai koe gu hagaola mai au i de magau,
ma de hai gi dee baguu au,
gai au ga seesee ai i mada luu mada o de Maadua
i de maalama o de mouli.