57
Ange gi tagi o taahili; e hua bei de leo o “Aude oohaa”. Se Miktam nii David, i de masavaa oona ne hano ai ga mmuni i a Saul i lo te haonga i gaogao de mounga
1 De Maadua, lodo aloha mai gi de au,
lodo aloha mai gi de au, go koe dogu buibui;
au e ssala dogu buibui i lalo de malu o luoo bakau,
ga dae ai gi de sili de madangi mmahi.
2 Au e hagahi de Maadua Maolunga Mmao,
go de Maadua e hagassula ina dana hagatau mai gi de au.
3 Ia e basa mai i de langi ga hagaola mai au,
ia e hagadogaa tangada e hagamaolunga i de au.
Selah
De Maadua e hagaago mai dono abodonu
ma dono hai hegau i de muna abodonu.
4 Au e noho i magavaa o denga laiono;
au e dagodo i magavaa o denga manu alasala:
go dangada e hanu olaadeu niho e bei denga dao nnui aama dao o de mee hholu,
olaadeu alelo e kangi bei denga gadilaasa.
5 De Maadua, doo hagaamua gi maolunga ange i de langi,
gai doo mahamaha gi dagodo i henua i lalo alodahi.
6 Gilaadeu e dugu de galauna e buulou ai au;
gai au gu kona mmao de manavasaa ogu lodo.
Gilaadeu gu geli dahi geelinga i honga dogu haiava e seesee ai,
aagai go gilaadeu donu huu ne too ange gi ono lodo.
Selah
7 De Maadua, ogu lodo e dee sui donu,
ogu lodo e dee sui donu;
au e daahili ma de tuhi goe!
8 Dogu hagasaalunga, alahage!
De harp ma de lyre, gooluu aalahage!
Au e alahage naa hogi i taiao gohugohu.
9 Dogu Ia Aamua, au e hagaahe adu de abodonu i magavaa o denga huaadangada;
au e daahili ga tuhi goe i magavaa o denga huaahenua.
10 Go hiidinga doo abodonu e laumalie mmao, gai e hano loo ga dae gi de langi;
doo hai hegau i de mee abodonu e dae loo gi lo te langi i lunga.
11 De Maadua, doo hagaamua e maolunga ange i de langi,
gai doo mahamaha gi dagodo i henua i lalo alodahi!