60
Ange gi tagi o taahili; gai e hua i de leo o “Denga lilii o de hagatoo donu hagaheloongoi”. De lilii o de tala hagadonu. Se Miktam nii David, e agoago ai. I de masavaa o David ne hebagi ange ai gi Mesopotamia ma Syria Zobah, ma de masavaa o Joab ne ahe mai ai, ga daa ga maakau e 12,000 dangada i Edom, i de Geelonga o denga Soolo
1 De Maadua, koe gu tili gimaadeu, ma de oha omaadeu buibui;
koe ne lili i gimaadeu; ahe ange hagaahea mai gimaadeu!
2 Koe ne hagangalungalue de henua ga hai gu mahangahanga;
hagaahea age ono mommee gu maoha laa,
i hiidinga gu dai baakuu.
3 Koe gu hai oo dangada gi gidee denga masavaa hai ngadaa;
koe gu hai gimaadeu gi unumia uvaini gi ssee saele ai gimaadeu.
4 Aagai koe gu hagaduu age dahi hagailonga ange gi gilaadeu e maatagu i de goe,
gi maua ai e gilaadeu i de hulo e mmuni i de mee hholu.
Selah
5 Gai hagaola ina gimaadeu i doo lima madau,
ma de basa mai gi amaadeu dalodalo,
gi ola ai gilaadeu oou e aloha ai.
6 De Maadua gu basa mai i dono mommee dabu:
“Au e vaevae naa Shechem i de malangilangi,
ma de haide de geelonga o Succoth.
7 Niiogu Gilead, niiogu Manasseh;
Ephraim go dogu goobai baalanga;
Judah go dagu laagau hodooligi.
8 Moab go dogu beisini gaugau;
au e maga ange dogu mee vae gi honga o Edom;*au e maga … Edom e bei go au e henua i Edom.
gai au e oo e tala dogu kii i Philistia.”
9 Goai e gaavee au gi de aduhale buibui laa?
Goai e dagina ngau gi Edom?
10 De Maadua, e dee go koe ne dilia laa gimaadeu,
gai gu dee hano madali omaadeu hagabuulinga hebagi?
11 Balea mai gimaadeu e hebagi ange ai gi de hagadaumee,
go hiidinga de bale mai i daho dangada
e deai ono haigamaiana.
12 De bale a de Maadua e hagammahi gimaadeu,
gai go ia e hagadee kii ina omaadeu hagadaumee.