59
Ange gi tagi o taahili; e hua bei de leo o “Aude oohaa”. Se Miktam nii David, i de masavaa a Saul ne hai ai hanu daane, gi hulo gi mulidagi ina de hale o David, gi daia ai ia gi magau
1 Dogu Maadua, hagaola ina mai au i ogu hagadaumee,
buibuia loo au i gilaadeu e llodo e hai baasi mai gi de au.
2 Hagaola ina mai au i gilaadeu e haia de baubau,
ma de hagamouli au mai i gilaadeu e daia dangada gi maakau.
3 Tilo, gilaadeu e tali au e daa gi magau;
denga daane alasala e hagasaele de hai baasi mai gi de au.
Tagi Maolunga, e deai donu ogu haisala aabe ni baubau.
4 Au tigi hai donu dahi mee dee heohi, gai gilaadeu gu nnoho e hebagi mai.
Hidi age balea mai au; galo mai diiloo ogu dagodo!
5 Tagi Maolunga, de Maadua o denga hagabuulinga hebagi,
hidi age hagaduasala ina denga huaahenua alodahi;
koe gi dee degi ange gi de gau baubau.
Selah
6 Gilaadeu e aahe mai i de ahiahi,
ga koo bei denga gaaduu ma de nnoho saele i lo te aduhale.
7 Tilo, gilaadeu e pasa hagamaolunga,
gai alaadeu muna e kangi bei de gadilaasa;
gilaadeu e hagataba, “Goai naa donu e langona adaadeu muna?”
8 Aagai koe, Tagi Maolunga, e gadagada i gilaadeu;
koe e doo mee i denga huaahenua alodahi.
9 Ogu mahi, au e dagitilo doo dae mai;
i hiidinga koe, de Maadua, go dogu mommee buibui makaga.
10 Dogu Maadua e hedae mai naa gi de au i hiidinga dono abodonu;
ia e hai naa gi gidee e au de hagadee kii o ogu hagadaumee.
11 De Ia Aamua, demaadeu mee hungihungi,
koe gi dee daia gilaadeu gi maakau,
gi dee ngalo ai e ogu dangada.
Gai haia gilaadeu gi silivaahea saele i doo sauaa mahi,
ma de hai gi dee kii gilaadeu.
12 I hiidinga haisala o olaadeu ngudu aama alaadeu muna gu tala,
gai olaadeu hagamaolunga gi aahe ange donu huu gi gilaadeu.
I hiidinga alaadeu muna hagamalaia aama alaadeu muna hhadu ne tala,
13 hagallilo ina gilaadeu i doo bole,
hagallilo ina gilaadeu ga dae ai gi teai se gilaadeu e doe.
Gai henua i lalo alodahi e iloo naa
bolo go de Maadua e dagina Jacob.
Selah
14 Ahiahi alodahi gai gilaadeu e aahe mai,
ga koo bei denga gaaduu ma de aheahe saele i lo te aduhale.
15 Gilaadeu e hagadaga saele e sala gai,
ma de koo bei denga manu e dee boobosu.
16 Aagai au e daahili naa e tuhi oo mmahi;
au e oo naa i taiao ga daahili i hiidinga doo abodonu.
I hiidinga go koe dogu mommee buibui makaga,
gai go dogu buibui i de masavaa hai ngadaa.
17 De Maadua, ogu mahi, au e daahili e tuhi ai goe,
go hiidinga go koe dogu mommee buibui makaga,
gai go de Maadua e abodonu mai laa gi de au.