1 De Maadua, hagalangona agu muna i dogu nanu;

buibuia dogu mouli i mee a dogu hagadaumee e hagamadagu ai au.

2 Buibui mai au i hagatau a tangada baubau e hagammuni laa,

ma mai i de hagabuulinga o dangada e haia de baubau.

3 Olaadeu alelo e kangi bei denga gadilaasa,

gai alaadeu muna e bei dao hagamaakau o de mee hholu.

4 Gilaadeu e mmuni ma e tili ai tangada tigi haisala;

gai gilaadeu e daa hagalele donu de tili ia, gai e dee maatagu.

5 Gilaadeu e hagadau hagammahi i alaadeu hagatau baubau;

gilaadeu e madaangudu i de hai e hagammuni ai alaadeu sele;

gilaadeu e hagataba, “Goai naa donu e gidee mee nei?”

6 Gilaadeu e hai dahi hagatau dee heohi, ma de hagataba,

“Taadeu hagatau gu hai e danuaa mmao!”

Maanadu ma lodo o tangada e gelo mmao.

7 Aagai de Maadua e tili naa gilaadeu i dao o dana mee hholu,

gai e moolau naa donu de lagolagohia.

8 Ia e hai naa alaadeu muna donu gi hai baasi ange gi gilaadeu,

gai ia ga oha ai gilaadeu;

dangada alodahi e gidee gilaadeu e geugeu naa olaadeu biho.

9 Dangada alodahi e maatagu naa;

gilaadeu e tala naa dagodo hegau a de Maadua

ma de maanadu dagodo o ana hegau gu hai.

10 Gilaadeu e heohi e malangilangi i Tagi Maolunga,

gai gilaadeu e buibui i ono daha;

dangada alodahi e heohi gi duuhia ia!