1 De Maadua, e heohi donu de tuhi goe i Zion,

ma de hagassula amaadeu hagatoo donu adu gi de goe.

2 Koe, de ia e hagalaangona amaadeu dalodalo,

dangada alodahi gi loomai gi de goe.

3 De masavaa o ogu baubau ne hai baasi mai ai gi de au,

gai koe ne degi mai gi omaadeu haisala.

4 E manuuia gilaadeu aau e hili ga gaamai,

gi noho i lo te buibui o doo hale!

Gimaadeu e duadonu naa i mee danuaa i doo hale,

go doo temple dabu.

5 De Maadua, demaadeu Ia Hagaola,

koe ne basa mai gi amaadeu dalodalo i au hegau hagalele mouli,

go koe de tali hagalodolodo o henua i lalo alodahi

ma mommee mmao i honga tai.

6 Koe ne hagatuu denga mounga i oo mahi,

ma de hagahai hegau oo mahi;

7 koe ne hai gi malino honga tai beabeau,

ma de hai gi dee hagalongaa denga beau,

gai ne hai gi dee hellumi denga huaadangada.

8 Dangada i luu bido o henua i lalo e maatagu i au hagailonga;

koe e hai gi humai de malangilangi

i baasi dua ga hano ai gi de baasi dai.

9 Koe e hano iho ga hagamaluulu henua i lalo;

koe e hai gi ssomo danuaa mee i honga de gelegele.

Denga saalingaa vai a de Maadua e hoohonu i de vai;

koe e gaavange gi dangada alaadeu grain,

gai go dau hagatau ne hai ai mee nei.

10 Koe e hagamaluulu ono mommee gu hagabalabala,

ma de hagassoe denga mommee maolunga.

Koe e hagabalabala de gelegele i de langi pala,

ma de hagamanuuia de gelegele gi ssomo ai denga manu.

11 Koe e hagamanuuia de ngadau i tau gai laumalie,

gai au hada gu hoohonu i mee lagolago.

12 De mommee iai helii i lodo henua gu lagolago mmao,

gai denga duuduu gu malangilangi.

13 Mommee iai helii gu hoohonu i denga hagabuulingaa ssiibi,

gai lodo geelonga gu dohu i denga grain;

gilaadeu e hevaalogi ma de malangilangi ma de daahili.