1 Henua i lalo alodahi, goodou hevaalogi duuhia de Maadua i de malangilangi!

2 Daahili mage hagamahamaha ina dono ingoo;

gai haia gi mahamaha dono tuhi!

3 Hai ange gi de Maadua, “Au hegau e hagamaatagu mmao!

Doo sauaa e laumalie mmao

gai oo hagadaumee e bolebole i oo mada i mua.

4 Henua i lalo alodahi gi daumaha adu gi de goe;

gilaadeu gi duuhia goe i taahili,

gilaadeu gi duuhia doo ingoo i taahili.”

5 Loomai diiloo mee a de Maadua gu hai:

ana hegau i daho dangada e hagamaatagu mmao.

6 Ia ne hai gi masa tai bei de uda henua;

gai gilaadeu ne seesee ga hulo laa lo te vai.*Exo 14.21; Josh 3.14-17

Gimaadeu ne malangilangi i kilaa i de ia

7 e dagina ga hano ai i dono sauaa,

gai ia e daumada denga huaahenua.

De gau hagamaolunga gi dee hai baasi ange gi de ia.

8 Denga huaadangada, goodou duuhia taadeu Maadua,

gai haia gi langona e dangada doodou tuhi ia;

9 ia ne hagaola omaadeu mouli,

gai ne daohi gimaadeu gi dee baakuu.

10 De Maadua, koe gu hagatale ange omaadeu dagodo;

koe gu hagagilimalali gimaadeu bei de hagagilimalali o denga selevaa i de ahi.

11 Koe ne buulou gimaadeu i de gatae,

ma de hai gimaadeu gi hagauda ina mee daemaha gi honga omaadeu dua.

12 Koe ne hai dangada gi dagina ma de vaivai hai gimaadeu;

gimaadeu ne hulo laa lo te ahi ma de vai;

aagai koe ne gaamai gimaadeu gi dahi henua iai mee lagolago.

13 Au e gaamai naa gi doo hale agu sigidaumaha dudu;

au e hagassula naa donu agu mee gu hagatoo donu ai,

14 ma agu muna gu tala ma de hagatoo donu ai

i de masavaa oogu ne hai ngadaa ai.

15 Au e hai naa denga sigidaumaha dudu i denga manu pedi,

ma de hai gi buu age de useahi o ssigidaumaha o denga ssiibi daane;

gai au e hai naa sigidaumaha i denga kaau daane aama denga guudi.

16 Goodou alodahi e maatagu i de Maadua, loomai hagalaangona,

gai au ga tala adu dagodo ana mee ne hai mai gi de au.

17 Au ne dangi ange ia gi balea mai au,

au e hagaamua ia i dagu tuhi.

18 Noo au e daohi dahi baubau i ogu lodo,

gai de Ia Aamua e dee hagallongo dagu dalodalo.

19 Ni muna abodonu de Maadua e hagallongo;

ia e hagallongo donu dagu dalodalo.

20 Hagadegi ina de Maadua,

i hiidinga ia tee hagangadi mee dagu dalodalo

aabe tee abodonu mai gi de au!