1 De Maadua gi hidi age, gai ono hagadaumee gi mavaevae saele;

gilaadeu e kino i de ia gi saavini gi hulo gee i ono mada i mua.

2 Haia gilaadeu gi dee maaleva

bei de useahi e ilihia laa ga gaavee i de madangi;

gai de gau baubau e maakau naa i mada luu mada o de Maadua,

bei dagodo o de candle e vaivai laa i de ahi!

3 Aagai gilaadeu e heohi e llodo danuaa naa,

ma de malangilangi i mada luu mada o de Maadua;

gilaadeu gi malangilangi mmao ma de lodo danuaa.

4 Daahili ange gi de Maadua, daahili duuhia dono ingoo;

daahili ange gi de ia e gage laa i honga denga giliiga —

dono ingoo go Iahweh —

gai gi malangilangi i ono mada i mua.

5 De Maadua e noho laa i honga dono mommee dabu,

go tamana o denga gauligi gu deai olaadeu damana,

gai ia e buibui denga haahine gu maakau olaadeu bodu.

6 De Maadua e gaavange gi tangada hagaaloha dahi huaabodu,

ma de hagassao mai dangada i de hale pono ga hagailaage gilaadeu;

gai de gau makaga olaadeu lodo e nnoho naa i de henua e deai vai iai.

7 De Maadua, de masavaa naa huu oou e hano ai i mada i mua o oo dangada,

de masavaa oou ne dagi ai gilaadeu i de vao,

8 gai henua i lalo gu ngalungalue, de langi gu hai gi pala iho de langi,

i mada i mua o de Maadua, de Maadua o Sinai,

i mada i mua o de Maadua, de Maadua o Israel.*Exo 19.18

9 De Maadua, koe ne hai gi kona de bala de langi;

koe ne hagammahi de henua o doo boolonga

i de masavaa ne baageaa ai.

10 Oo dangada gu nnoho i kilaa;

de Maadua, koe ne hagadanuaa gilaadeu e duasala i doo abodonu.

11 De Ia Aamua e hagailoo ana muna,

gai e soa haahine ne hagadele ina muna nei:

12 “Denga hodooligi ma olaadeu hagabuulinga hebagi gu saavini ma gu hulo gee;

denga haahine i mommee nnoho gaainga gu duha goloa ne maua i de hebagi,

13 gai ga nnoho naa donu goodou i de mommee iai buibui o denga ssiibi —

gai denga bakau o de manu kono e haoli i selevaa,

ono hulu manu ni goolo malamalama.”

14 De masavaa o de Ia Mmahi Mmao laa ne hagadee kii ai denga hodooligi i kilaa,

gai denga snow gu malili iho gi honga o Zalmon.

15 De mounga o de Maadua e bei denga mounga o Bashan;

gai mounga o Bashan e lagolago ono ulu!

16 Denga mounga kangi ulu,

gu aha gu llodo gaiaa ange ai goodou

gi de mounga a de Maadua gu hili e noho ai e dagi,

gai go de mommee o Tagi Maolunga e noho ga hano ai?

17 Hada hebagi o de Maadua e lagolago ange i tahisemada,

gai e lagolago ange i tahiseguli;

de Ia Aamua gu humai i Sinai gi dono mommee dabu.

18 Koe ne hanage gi de mommee maolunga,

ma de dagi de gau dee kii madali goe,

koe ne kave mee ngadi gaavange mai i daho dangada;

aama daho dangada hogi e hai baasi adu,

gai koe, Tagi Maolunga de Maadua, ga noho ai i kilaa.*Eph 4.8

19 Duuhia de Ia Aamua, de Maadua taadeu Ia Hagaola,

go de ia e hagauda ina odaadeu daemaha i laangi alodahi.

20 Taadeu Maadua se Maadua e hagaola ina;

de Ia Aamua go Iahweh e hagaola ina gidaadeu mai i de magau.

21 De Maadua e hagabalaginagina naa biho o ono hagadaumee,

go biho o olaadeu e duudagi ina de hai de baubau.

22 De Ia Aamua e hagadaba, “Au e hagaahe mai naa gilaadeu mai i Bashan,

au e hagaahe age naa gilaadeu i lo te moana gelo,

23 gai koe ga seesee saele ai i lodo olaadeu dodo,

gai denga gaaduu e samusamu naa dodo o oo hagadaumee.”

24 De Maadua, gu gidee adu de daga mai o doo hagabuulinga,

de hagabuulinga o dogu Maadua ma dogu Hodooligi gu ulu gi lo te mommee dabu.

25 Go de gau daahili i mua, olaadeu dua go de gau hagadangidangi,

gai lo te ungaalodo go denga damaa hine e hagailiilia denga tambourine.

26 Hagadegi ina de Maadua i lo te hagabuulinga laumalie,

hagadegi ina Tagi Maolunga, goodou de hagabuulinga o de gau Israel.

27 De aamuli o Benjamin e sogoisi laa ono dangada, e dagi gilaadeu,

gai denga dagi soa o Judah i kilaa hogi,

aama denga dagi hogi o Zebulun ma Naphtali.

28 De Maadua, hagahai hegau ina oo mahi;

De Maadua, hagaagona mai gi gimaadeu doo sauaa,

go ssauaa aau ne hagahai hegau laa i omaadeu hiidinga.

29 I hiidinga doo temple i Jerusalem,

denga hodooligi e gaamai naa gi de goe mee ngadi gaavange.

30 Hagaseegina denga manu i magavaa o denga aalege,

ma denga manu mmahi i magavaa o denga kaau gauligi a denga huaahenua.

Dagadagahia gi lalo gilaadeu e nnoo ange gi denga selevaa.

Haia gi mavaevae saele dangada e malangilangi i de hebagi.

31 De gau aamua o Egypt e loomai naa;

Ethiopia e ino ange naa gi de Maadua.

32 Denga nohoanga hodooligi i henua i lalo,

daahili ange gi de Maadua

ma de tuhi de Ia Aamua i taahili,

33 go de ia e lele laa i lo te langi i lunga mai madagidagi loo;

ma de hai gi langona dono leo mmahi.

34 Daalaa dagodo mahi o de Maadua;

gai go ia iai ssauaa e dagi i honga o Israel,

gai ono mahi e hagaago mai i lo te langi.

35 De Maadua, koe e hagamaatagu mmao, i doo mommee dabu;

de Maadua o Israel ne gaavange de mmahi ma ssauaa gi dono huaadangada.

Hagadegi ina de Maadua!