69
Ange gi tagi o taahili; e hua i de leo o “Denga lilii”. Se Psalm nii David
1 De Maadua, hagaola ina mai au,
go hiidinga denga vai gu dae age loo gi dogu ua.
2 Au gu dai lilo donu gi lo te bela,
go de mommee e deai se mommee e tuu ange luoogu vae aagena.
Au gu doo gi lo te moana gelo,
denga vai gu haoli au.
3 Au gu dalea mmao i de dangidangi i de bale;
dogu holomanga gu mmasa gee.
Luoogu mada gu daalea i de dagitilo de humai o dogu Maadua.
4 Gilaadeu e kino i de au, gai e deai donu hiidinga,
e lagolago ange i ngaangaaulu o dogu biho;
ogu hagadaumee e hadu muna i de au,
gai e soa gilaadeu e hagatale de daa au gi magau.
Gai gilaadeu e hai au gi hagaahe ange mee aagu tee gaiaa.*Psa 35.19; John 15.25
5 De Maadua, koe e iloo dagodo o dogu lodo senga;
au e dee maua i de hagammuni ogu haisala i de goe.
6 De Ia Aamua, Tagi o denga hagabuulinga hebagi,
koe gi dee hagadookaa ina gilaadeu e hagadonusia goe i ogu hiidinga.
De Maadua o Israel,
koe gi dee hagadookaa ina gilaadeu e saalaa goe i ogu hiidinga.
7 I hiidinga au gu hagadogaa ina i oo hiidinga,
gai au gu haoli luoogu mada i hiidinga de kona dogu dogaa.
8 Au gu bei tangada henua gee i daho ogu daina,
gai se dangada henua gee i daho dama a dogu dinana.
9 Ogu lodo gu honu i de lodo gaiaa i hiidinga o doo hale;
gilaadeu e hagadogaa ina goe e hagadogaa donu hogi au.*John 2.17; Rom 15.3
10 De masavaa oogu e dangi ai ma de hagahiigai,
gai au ne hagadogaa ina.
11 De masavaa oogu ne gahu ai i malo daladala,
gai gilaadeu ne hakadanga i de au.
12 Dangada i gaogao de haitoga o de buibui e pasa i de au,
gai de gau ssenga gu hadu dahi daahili i de au.
13 Aagai au e dalodalo adu gi de goe, Tagi Maolunga,
i de masavaa o doo abodonu;
basa mai gi dagu dalodalo i hiidinga doo abodonu laumalie,
ma doo hai hegau i de mee abodonu.
14 Daangia age au i lo te bela pigi oogu gu dai danumia ai;
hagaola ina mai au i gilaadeu e kino i de au,
ma mai i lo te moana gelo.
15 Koe gi dee dugua ange tolona gi haia gi abulu au,
aabe gi haia de moana gelo gi haolia iho au,
aabe gi haolia ange au i lo te daanunga.
16 Tagi Maolunga, basa mai gi dagu dalodalo i hiidinga doo lodo aloha;
anga mai gi de au, i hiidinga doo abodonu e laumalie mmao.
17 Aude hagamuunia luoo mada i de au, doo dangada hai hegau;
hagamoolau basa mai gi dagu dalodalo, i hiidinga au gu duasala mmao.
18 Hagabaa mai gi de au ma gi hagaola ina mai au;
hagaola ina mai au i ogu hagadaumee.
19 Koe e iloo dogu hagangadi mee ina,
ma dogu hagadogaa ina aama dogu dee hagadubulia;
gai koe e iloo ogu hagadaumee alodahi.
20 Au gu kona mmao de mmae ogu lodo i dogu hagadogaa ina,
gai au gu dee baba ogu lodo.
Au ne ssala dahi gi lodo aloha mai gi de au,
aagai au tee gidee dahi dangada daudahi;
au ne ssala dahi dangada gi hagaaneane ina ogu lodo,
gai au tee gidee dahi dangada daudahi.
21 Gilaadeu ne gaavange mee hagammau gi lodo agu gai,
ma de hagaunu au i denga mee mmala.*Mat 27.48; Mark 15.36; Luke 23.36; John 19.28-29
22 Haia deebele o alaadeu daonga gi se sele;
gai delaadeu nnoho paba gi se mee e noodia ai gilaadeu.*Rom 11.9-10
23 Haia gi gohu olaadeu ganomada, gi dee kide ai gilaadeu;
gai haia gi bolebole olaadeu angaanga i masavaa alodahi.
24 Hagaduasala ina gilaadeu i doo bole,
gai doo lili laumalie gi hagaduasala ina gilaadeu.
25 Haia delaadeu mommee gi ngadi dagodo,
gai gi deai dangada e nnoho i lodo olaadeu hale malo.*Acts 1.20
26 Go hiidinga gilaadeu ne vaivai hai tangada aau gu haele,
ma de hagammae tangada aau gu hagalagohia.
27 Hagaduasala ina gilaadeu i haisala lagolago,
gai koe aude degi ange gi gilaadeu.
28 Sooloa olaadeu ingoo i lo te beebaa o de mouli,
gai olaadeu ingoo gi dee sisi madali dangada e heohi laa.*Exo 32.32; Rev 3.5; 13.8; 17.8
29 Au e duasala ma de mmae;
dogu Maadua, koe gi hagaola ina ma de dugu age au gi de mommee maolunga!
30 Au e daahili e tuhi de ingoo o de Maadua,
ma de hagaamua ia aama de hagaahe ange de abodonu.
31 Gai Tagi Maolunga e kii ange dono malangilangi i de mee nei
i dono malangilangi i denga kaau e hai ai laa ssigidaumaha.
32 Gai gi malangilangi ai gilaadeu e duasala i delaadeu gide mee nei;
dangada e saalaa de Maadua e maamaane olaadeu lodo.
33 I hiidinga Tagi Maolunga e hagallongo talodalo a tangada e duasala,
gai ia e dee ngalo ono dangada e nnoho i lo te hale pono.
34 De langi ma henua i lalo gi duuhia ia,
ma tai aama mee alodahi e mouli i ono lodo.
35 Go hiidinga de Maadua e hagaola naa Zion
ma de ahe ange ga hagatuu age denga aduhale o Judah,
gai gilaadeu e nnoho naa i kilaa ga henua ai.
36 Gai dama a ono dangada hai hegau e kave naa ga henua ai,
gai dangada e aaloha i de ia e nnoho ai naa.