Tolu beebaa
73
(Psalm 73—89)
Se Psalm nii Asaph
1 Ni muna abodonu, de Maadua e abodonu ange gi Israel,
aama ange gi gilaadeu e gilimalali olaadeu lodo.
2 Aagai au, luoogu vae ne dai ssege donu,
gai ne momo ange huu au gu baguu.
3 Go hiidinga au ne lodo gaiaa ange gi de gau pasa hagamaolunga,
i dagu gidee de hagadagadaga age o de gau baubau.
4 Gilaadeu e dee gidee naa donu denga hai ngadaa i olaadeu mouli,
gai olaadeu angaanga e mmahi ma de pedi.
5 Gilaadeu e dee hai ngadaa donu bei dangada ange laa;
gai gilaadeu e dee hagaduasala bei de gau ange laa.
6 Deelaa ai, de hagamaolunga go de mee dau i olaadeu ua;
gai olaadeu malo e kahu ai go de alasala.
7 Olaadeu ganomada e hhua i hiidinga delaadeu pedi,*Olaadeu ganomada … pedi, aabe go olaadeu baubau e loomai i olaadeu lodo.
gai olaadeu lodo e hoohonu i denga maanadu baubau.
8 Gilaadeu e doo mee ma de pasa baubau i dangada;
gilaadeu e hagamaatagu dangada i de hagamaolunga.
9 Gilaadeu e pasa ma e hai baasi ange gi de langi,
gai olaadeu alelo e aheahe saele i henua i lalo.
10 Deelaa ai, ono dangada e huuhuli ange gi gilaadeu,
ma de llodo e unu vai lagolago.†De hagadoonunga o muna Hebrew i kinei e dee iloo danuaa. Dahi hagadoonunga deenei: dangada e huuhuli ange gi de gau baubau ma de llodo e kave alaadeu hegau baubau bei de unu ai laa vai lagolago.
11 Gilaadeu e hagataba, “Dee hee de hai a de Maadua e iloo ai mee nei?
E aha, e dahi nei donu iloo mee o de Ia Maolunga Mmao laa?”
12 Tilo, aanei dagodo o de gau baubau;
gilaadeu e duadonu, gai olaadeu goloa e hagadaga ange de lanea.
13 Ni muna abodonu, teai donu haigamaiana dagu hai gi gilimalali ogu lodo,
ma de daohi luoogu lima gi dee haisala.
14 Mai i taiao ga boo ai gai au e duasala,
gai au e duasala i daiao alodahi.
15 Noo au e basa bee nei,
gai tilo, au gu hagangadi mee de atangada o au dama.
16 Gai ga maanadu huu au dagodo o de mee nei,
gai e hai ngadaa mmao i dogu donu ange aagena,
17 ga dae ai gi dogu hano gi lo te hale dabu o de Maadua;
gai au gu donu ange gi de hagaodi o de gau bee nei.
18 Ni muna abodonu, koe ne hai gilaadeu gi tuu i de mommee segesege;
ma de hai gilaadeu gi too ange gi de magau.
19 Gai ne daa hagalele donu delaadeu maakau,
ma de gaavee gee alodahi i de mee hagamaakau!
20 Gilaadeu e bei de midi e ngalo laa i de alahage o tangada;
dogu Ia Aamua, de masavaa oou e hidi age ai,
gai koe gi hagangadi mee ina gilaadeu bei dagodo o denga ngadi midi.
21 De masavaa oogu ne daemaha ai,
ma de mmae ogu lodo,
22 au se dangada senga ma teai agu mee e iloo,
bei dagodo o de manu lodo henua i mada luoo mada.
23 Aagai au e noho i oo daha ga hano ai;
koe gi boogia dogu lima madau.
24 Koe e dagina huu au i au muna bale,
gai muli mai gai koe ga hagaulu au i mommee mahamaha.
25 E deai ange donu sogu bale i de langi, go koe donu huu!
Gai e deai ange donu se mee oogu e lodo ai i henua i lalo, go koe donu huu!
26 Dogu angaanga ma ogu lodo e baageaa naa,
aagai go de Maadua e hagammahi ina ogu lodo,
go ia dogu duuhanga ga hano ai.
27 Tilo, dangada e hagammao gee i de goe e maakau donu;
gai koe e daa gi maakau gilaadeu e hulo gee mai i de goe.
28 Aagai au, e danuaa dogu hagabaa ange gi de Maadua;
au gu hai de Ia Aamua go Iahweh go dogu buibui,
gai au ga tala ai dagodo o au hegau alodahi.