1 De Maadua, gu aha gu tili ai naa goe gimaadeu ga hano ai?

Gu aha goe gu kona ai naa doo lili i au ssiibi,

go ssiibi i dau mommee iai helii?

2 Manadua doo huaadangada aau ne hagao madagidagi,

go de aamuli aau ne hagaola e hai ai oo dangada,

de mounga go Zion, go doo mommee e noho ai.

3 Hannoo seesee i de mommee gu odi laa i de maoha;

de hagadaumee gu oha alodahi doo hale dabu!

4 Oo hagadaumee ne hagangolo i doo mommee hagabuni;

gilaadeu gu hagatuu age olaadeu hagailonga i kilaa.

5 Gilaadeu e bei dangada e haia laa alaadeu daguu

ga sele ai denga manu ssomo i lodo mee muimui.

6 Gilaadeu gu oha denga laagau gu daadaa i kilaa

i denga daguu ma haamaa.

7 Gilaadeu gu dudu doo mommee dabu ma gu odi iho gi honga de gelegele;

gilaadeu gu hai ma gu dee gilimalali de mommee iai doo ingoo.

8 Gilaadeu gu hagataba i olaadeu lodo, “Gidaadeu ga hagadee kii gilaadeu;”

gilaadeu gu dudu mommee alodahi e daumaha ange ai gi de Maadua i de henua.

9 Gu deai hagailonga hagalele mouli amaadeu e gidee;

gu deai hogi pelaabisi e doe,

gai gu deai se gimaadeu e iloo be dee hee maa taulooloa de hai de mee nei.

10 De Maadua, dee hee maa taulooloa de kada o oo hagadaumee i de goe?

E aha, oo hagadaumee e hagangadi mee naa doo ingoo ga hano ai?

11 Gu aha gu dee hagaabo ai naa doo lima, doo lima madau?

Gai gu aha gu dee aau mai ai naa doo lima i oo hadahada e daa ai gilaadeu?

12 Aagai koe, de Maadua, go demaadeu Hodooligi mai madagidagi loo,

koe ne hagahai hegau de hagaola i henua i lalo alodahi.

13 Koe ne vvae lua tai i doo sauaa;

gai koe ne hagabalaginagina biho o denga dragon i honga de lausedi.*Exo 14.21

14 Koe ne hagabalaginagina denga biho o de Leviathan,

ga haangai ange ai denga manu lodo henua.*Job 41.1; Psa 104.26; Isa 27.1

15 Go koe ne huugea denga vai ma saalingaa vai;

koe ne hai gi maamasa denga saalingaa vai mmahi.

16 Niiau de laangi, gai niiau de boo;

go koe ne haia de laa ma de maasina.

17 Go koe ne hagatuulia goinga alodahi o henua i lalo,

go koe ne hagailonga ina de masavaa mahanahana ma de hagamagalili.

18 Tagi Maolunga, manadua de doo mee o de hagadaumee i de goe,

ma de hagangadi mee a de gau llodo ssenga doo ingoo.

19 Aude dugua ange de mouli o dau manu kono gi denga manu aada;

aude ngalo de hagaduasala ina o oo dangada ga hano ai.

20 Koe gi haia gi bei dau hagatoo donu hagaheloongoi;

go hiidinga denga mommee gohu i honga de henua iai de gau e vaivai haia dangada.

21 Koe gi dee hagadookaa ina gilaadeu e duasala;

gai gilaadeu e hagaau aloha ma gilaadeu e duasala ga tuhi ai goe.

22 De Maadua, hidi age, daalaa hagadanuaa ina au hagatau;

gai manadua de doo mee o de gau llodo ssenga

i de goe i taiao ga boo ai.

23 Koe gi dee hagadee anga ange gi muna lagolago a oo hagadaumee,

ma de hagalongaa o dangada e kino i de goe i masavaa alodahi.