75
Ange gi tagi o taahili; e hua i de leo o “Aude oohaa”. Se Psalm nii Asaph. Se daahili
1 De Maadua, gimaadeu e hagaahe adu de abodonu gi de goe,
gimaadeu e hagaahe adu de abodonu, go hiidinga doo ingoo e baa mai donu;
dangada e tala dagodo o au hegau hagalele mouli.
2 ⌊E hagadaba de Maadua,⌋ “Au gu hagailonga de masavaa
aagu e hagamodu ai muna i de heohi.
3 De masavaa o henua i lalo e ngalungalue ai madali dangada iai,
gai go au e daohia gi makaga ono duludulu.
Selah
4 Au e hai ange gi tangada basa hagamaolunga, ‘Aude basa hagamaolunga,’
gai e hai ange gi tangada baubau, ‘Aude hagamaolunga;
5 aude hagamaolunga gi hai baasi ange ai gi de langi,
aude basa hagamaolunga i de hagamakaga oo lodo.’ ”
6 Go hiidinga de hai o tangada ga maolunga
e dee humai i dua be go dai, aabe e humai i de vao;
7 aagai go de Maadua de ia hagamodu muna,
go ia e hagamaolalo ina dahi dangada gai ga hai gi maolunga dahi.
8 Tagi Maolunga gu poo dahi ubu uvaini
iai ebuebu gai gu hilo danuaa;
ia e llingi naa uvaini nei,
gai de gau baubau alodahi i henua i lalo e unu naa
ga deai se madaua daudahi e doe.
9 Aagai au e lodo malangilangi naa ga hano ai,
au e daahili naa ga tuhi de Maadua o Jacob.
10 Au e hai naa donu gi deai mahi o de gau baubau alodahi,
aagai au e hai naa gi hagadagadaga age mahi olaadeu e heohi.