76
Ange gi tagi o taahili; e hua madali denga mee hagadangidangi iai daula. Se Psalm nii Asaph. Se daahili
1 De henua o Judah e iloo de Maadua,
dono ingoo e maolunga i Israel.
2 Dono hale gaainga e duu i Salem,
gai dono mommee noho i Zion.
3 Ia gu hadihadi denga dao ula o de hagadaumee
ma de mee hungihungi, ma de gadilaasa, aama denga goloa o de hebagi.
Selah
4 Koe e mahamaha mmao,
gai e maolunga ange i denga mounga iai manu e maua i de gai.
5 Denga daane hebagi mmahi gu gaavee olaadeu goloa hebagi,
gai gilaadeu gu sseni i sseni o de gau maakau;
denga daane aaboo i de hebagi gu dee maua i de langa age olaadeu lima.
6 De Maadua o Jacob, doo bole
gu daa de hoosa ma tangada e gage ai.
7 Aagai go koe donu huu e heohi de maatagu ai o dangada!
Goai e maua i de duu i mada luoo mada i de masavaa oou e lili ai?
8 Koe e hagamodu muna mai i de langi;
gai henua i lalo e dee mmuu naa i delaadeu maatagu,
9 de Maadua, i de masavaa aau ne hagamodu ai muna,
ma de hagaola gilaadeu alodahi e hagaduasala ina i henua i lalo.
Selah
10 Ni muna abodonu, de llili o dangada e hidi mai ai doo tuhi,
gai dangada e ola mai i de lili e dau adu naa gi de goe.*Muna Hebrew i de gubu nei e dee iloo danuaa dono hagadoonunga.
11 Haia au hagatoo donu ange gi Tagi Maolunga doo Maadua
gai hagassula ina mee nei;
dangada alodahi i henua e paa mai
gi gaamai mee ngadi gaavange gi de Ia Hagamaatagu.
12 Ia e hagamaolalo dagi o de henua,
gai denga hodooligi o henua i lalo e maatagu i de ia.