77
Ange gi tagi o taahili; e hua i de leo o Jeduthun. Se Psalm nii Asaph
1 Au ne dangi ange gi de Maadua,
au ne dangi ange mmao gi de Maadua,
gai ia ne hagallongo dagu dangi.
2 De masavaa oogu ne hai ngadaa ai, gai au ne ssala de Ia Aamua laa;
au tee dalea donu i de haalo luoogu lima i talodalo,
au tee lodo gi hagaaneane ina ogu lodo.
3 De masavaa aagu ne manadua ai goe, de Maadua, gai au ne gonogono;
dagu maanadu mee nei, gai au gu baageaa ogu lodo.
Selah
4 Koe ne daohi gi dee pono luoogu mada,
au tee maua i de basa i hiidinga tee baba ogu lodo.
5 Au ne maanadu dagodo o denga laangi gu hulo,
ma denga ngadau madagidagi.
6 Au ne manadua agu daahili i de boo;
ogu lodo ne hagasaele gai dogu hagasaalunga e ssili:
7 “E aha, de Ia Aamua e tili naa gidaadeu ga hano ai?
Ia gu dee ahe ange naa donu e abodonu mai?
8 E aha, gu deai nei donu sono abodonu ga hano ai?
Gai gu dee hagassula nei donu ana hagatoo donu i masavaa alodahi?
9 E aha, de Maadua gu ngalo laa dono lodo aloha?
Ia gu lili nei ma gu tuu dono lodo aloha?”
Selah
10 Gai au ga hagadaba, “Au e manavasaa
i de sui hegau a de Ia Maolunga Mmao laa.”
11 Au e hagamaanadu hegau a Tagi Maolunga;
au e maanadu au hegau hagalele mouli madagidagi loo.
12 Au e hagamaumau naa donu au hegau alodahi;
gai au e hagasaele au hegau mmahi.
13 De Maadua, au hegau e dabu.
Gai e deai ange se maadua e maolunga bei taadeu Maadua!
14 Go koe de Maadua e haia hegau hagalele mouli,
gai gu hagaago ange gi denga huaahenua doo mmahi.
15 Koe ne hagaola oo dangada i doo lima sauaa,
go de aamuli o Jacob ma Joseph.
Selah
16 De Maadua, denga vai ne gidee goe,
denga vai ne gidee goe, gai gilaadeu gu maatagu,
gai denga mommee kelo gu bolebole.
17 Denga hagausinga ne llingi iho vai;
denga hatuli ne babaa i lo te langi,
gai dao o au uila e labalaba ma e tae gi mommee alodahi.
18 De babaa o au hatuli e ngolo bei de madangi mmahi,
au uila e hagamaalama henua i lalo,
gai henua i lalo e ngalungalue ma de ngalullulu.
19 Doo haiava e hano laa lo te lausedi,
gai e hano laa magavaa o denga moana nnui;
gai duulanga o oo dabuvae e dee gi gidee donu.
20 Koe e dagi oo dangada bei dahi hagabuulingaa ssiibi
i daho Moses ma Aaron.