De Beebaa Dabu Psalm 78

Se Maskil nii Asaph

1 Ogu dangada, goodou nnoho mai hagalaangona agu agoago;

hagalaangona agu muna e tala adu gi goodou!

2 Au e basa naa i de mee hagasengasenga;

au e tala naa mee e dee iloo laa madagidagi,*

3 ni mee niidaadeu gu langona ma de iloo,

gai odaadeu maadua gu lava i de tala mai gi gidaadeu.

4 Gidaadeu e dee hagammuni donu mee nei mai i alaadeu gauligi,

gai e tala ange gi denga atangada e loomai i muli

dagodo hagailonga a Tagi Maolunga,

ma dono mahi, aama hegau hagalele mouli aana ne hai.

5 Ia ne hagasauaa ana muna ange gi dangada o Jacob,

ma de hagatuu denga hainga i Israel,

go muna aana gu tala ange gi odaadeu dubuna madagidagi,

gilaadeu gi agoagona ange ai alaadeu dama,

6 gi iloo ai e de atangada e humai,

ma denga dama tigi haanau,

gai gilaadeu ga tala ange ai gi alaadeu dama,

7 gai gilaadeu gi haia de Maadua go delaadeu tali,

gai gi dee ngalo hegau a de Maadua gu hai,

aagai gilaadeu gi daudali i ana hainga.

8 Gai gi dee bei ai gilaadeu dagodo olaadeu maadua —

olaadeu dubuna se atangada e makaga olaadeu lodo ma de hagamaanege,

olaadeu lodo tee maua i de tuu gi makaga,

gai olaadeu hagasaalunga tee hai hegau ange gi de Maadua i de mee abodonu.

9 De aamuli o Ephraim e hagauda alaadeu mee hholu,

aagai ne saavini ga hulo gee mai i de hebagi.

10 Gilaadeu tee daudali i de hagatoo donu hagaheloongoi a de Maadua,

gai tee llodo e seesee i ana hainga.

11 Gilaadeu gu ngalo ana hegau ne hai,

ma hegau hagalele mouli aana ne hagaago ange gi gilaadeu.

12 De Maadua ne hai denga hagailonga i madamada olaadeu dubuna

i de henua go Egypt, i mommee go Zoan.*

13 Ia ne hhanga lua de vai gai gilaadeu ga seesee i ono lodo,

gai ia ne hai denga vai gi hagabudubudu gi tuu gi lunga.*

14 Ia ne dagi gilaadeu i tuludulu giliiga i de laangi,

gai ne dagi gilaadeu i de maalama o de ahi ula i boo.*

15 Ia ne hangahanga denga hadu i de vao,

ma de gaavange gi gilaadeu vai lagolago bei de moana gelo.*

16 Ia ne hai denga saalingaa vai gi ssali age i lo te baba,

gai ne hai denga vai gi ssali iho bei denga saalingaa vai.

17 Aagai gilaadeu ne duudagi de haisala ange gi de ia,

ma de hai baasi ange gi de Ia Maolunga Mmao laa i de vao.

18 Gilaadeu se hagabau donu de hagatale de Maadua i olaadeu lodo

i delaadeu hai gi de mahi ia gi gaavange alaadeu gai e llodo ai.*

19 Gilaadeu ne hagadaumee ange gi de Maadua, ga ssili,

“E maua e de Maadua i de hhao dahi deebele gai i de vao?

20 Ia ne hagaili de hadu gai denga vai gu ssali mai ai,

gai denga vai ne hagahonu age i kilaa.

Aagai e aha, e maua naa e ia i de gaamai adaadeu gai,

ma de gaavange giidagi a ono dangada?”

21 De masavaa a Tagi Maolunga ne langona ai alaadeu muna, gai ia gu lili mmao;

gai dana ahi gu humai ga daa dangada o Jacob,

gai gu hai baasi ange gi Israel i dono bole,

22 i hiidinga gilaadeu tee hagadonusia de Maadua,

aabe ne hagadonusia bolo ia e hagaola gilaadeu.

23 Aagai ia ne basa ange gi lo te langi i lunga,

ma de hhuge denga haitoga o de langi;

24 gai ne hagamalili iho denga manna e gaimee ai gilaadeu,

ma de gaavange gi gilaadeu denga grain mai i de langi.*

25 Dangada o henua i lalo gu gaimee i gai a de gau de langi,

gai ia ne gaavange gi gilaadeu gai lagolago.

26 Ia ne hai de madangi mai i dua gi ssau mai i de langi,

ma de dagi de madangi mai i ngaage i dono sauaa.

27 Ia ne hai gi malili iho alaadeu giidagi bei denga gelegele,

ma denga manu llele lagolago bei gelegele i gaogao tai.

28 Ia ne hai gi toga iho denga manu

i lo te laadeu mommee nnoho gaainga,

aama luu baasi olaadeu mommee nnoho alodahi.

29 Gilaadeu ne gaimee ga kona de boobosu,

i hiidinga ia ne gaavange alaadeu mee e llodo e gai.

30 Gai mua delaadeu gaimee ga boobosu,

ma de masavaa olaadeu goi gaimee ai,

31 gai de lili o de Maadua ne hai baasi ange gi gilaadeu;

ia ne daa ga maakau denga daane mmahi i olaadeu magavaa,

gai ne hai denga daane dau i Israel gi too gi lalo.

32 Gai mee nei alodahi tee maua i de hai gilaadeu gi dee haisala;

gai gilaadeu tee hagadonu ana hegau hagalele mouli.

33 Gai ia ne hai gi llilo olaadeu laangi bei de madangi o de manava,

gai olaadeu ngadau e hoohonu i mee hagamaatagu.

34 Ga daia huu e ia hanu gilaadeu ga maakau,

gai gilaadeu ga aahe mai gi de ia,

ga daahuli olaadeu lodo ga ssala de Maadua.

35 Gai gilaadeu gu manadua bolo go de Maadua delaadeu baba makaga,

gai de Maadua Maolunga Mmao laa go delaadeu Ia Hagaola.

36 Aagai gilaadeu tee tala ange gi de ia de muna abodonu;

gai ne hadu muna ange gi de ia i olaadeu ngudu.

37 Gilaadeu tee hai hegau ange gi de ia i de lodo se muna abodonu;

gilaadeu tee daohi dana hagatoo donu hagaheloongoi.

38 Aagai ia ne lodo aloha, ga degi ange gi olaadeu baubau,

tee daa gilaadeu gi maakau.

Ia tee modu donu de golomagi ono lodo i gilaadeu,

tee hagahai hegau dono bole.

39 Gai ia ne manadua bolo gilaadeu ni dangada donu huu,

gai e bei de madangi e ssau mai laa ga hano gu dee ahe mai ange.

40 Gai tee modu donu delaadeu hai baasi ange gi de ia i de vao

ma de hagadaemaha ono lodo i lodo henua!

41 Gilaadeu ne hagatale ia i hanonga lagolago,

ma de hagadaemaha lodo o de Ia Dabu o Israel.

42 Gilaadeu tee manadua dagodo o ono mahi,

aabe go dana hagaola gilaadeu mai i de hagadaumee,

43 i de masavaa aana ne hai ai ana hagailonga i Egypt,

ma ana hegau hagalele mouli i denga mommee o Zoan.

44 Ia ne sui denga saalingaa vai gi ni dodo,

gai de gau Egypt gu dee maua i de unu ai.*

45 Ia ne gaamai denga lango lagolago gi hagaduasala ina gilaadeu,

ma kailu gi oohaa delaadeu henua.*

46 Ia ne gaavange hua o alaadeu veelenga gi de itebuubuu,

gai ne gaavange alaadeu hua manu gi itebuubuu.*

47 Ia ne hai gi oha alaadeu grapevine i dibaa haisi,

gai ne oha alaadeu sycamore i denga haisi.*

48 Ia ne daa alaadeu kaau i denga duudangaa haisi,

gai ne daa gi maakau alaadeu ssiibi i denga uila.

49 Ia ne hagaduasala gilaadeu i dono lili,

ma de bole, ma dono daemaha, ma mee hai ngadaa,

ma de hagabuulingaa dangada de langi o de magau.

50 Ia ne hagadabena e hai hegau i dono lili;

ia tee hagaola donu gilaadeu mai i de magau,

aagai ia ne gaavange gi gilaadeu denga mee hagamaakau.

51 Ia ne daa ga maakau denga ganimua alodahi o Egypt,

go dama ne haanau i de masavaa olaadeu e dama daane ai

i lodo hale malo o Ham.*

52 Gai ia ga hagassao mai ono dangada bei dagodo o denga ssiibi,

ga dagi gilaadeu i de vao bei de hagabuulingaa ssiibi.*

53 Ia ne dagi ma de hagaloosi gilaadeu,

deelaa ai, gilaadeu tee maatagu;*

aagai olaadeu hagadaumee ne maalemo i lo te vai.

54 Ia ne kave gilaadeu gi dono henua dabu,

ma de mounga aana ne kave i de kii.*

55 Ia ne hai gi hulo gee denga huaahenua i olaadeu daha;

ia ne vaevae ange delaadeu henua gi ono dangada

gai ga hagannoho denga aamuli o Israel i lodo olaadeu hale malo.*

56 Aagai gilaadeu ne hagatale de Maadua

ma de hai baasi ange gi de Ia Maolunga Mmao laa,

gilaadeu tee daudali i ana muna ange gi gilaadeu.*

57 Gilaadeu ne aahe dua ma tee hai hegau i de mee abodonu bei olaadeu dubuna madagidagi;

gai e deai se tali ange gi gilaadeu bei de mee hholu gu hadi laa.

58 Gilaadeu ne hai ia ga lili i hiidinga olaadeu mommee daumaha;

gilaadeu ne hai ia ga maagoda i hiidinga olaadeu diinonga.

59 Gai ga langona huu e de Maadua,

gai ia gu bole mmao, gai ia ga tili Israel.

60 Ia gu tili nei donu dono mommee noho i Shiloh,

go de hale malo oona e noho ai i magavaa o dangada.*

61 Ia ne dugu ange de ngavesi o ono mahi gi gaavee gee,

ma de dugu ange dono mahamaha gi lo te lima o dono hagadaumee.*

62 Ia ne dugu ange ono dangada gi de gadilaasa,

ia ne lili mmao i dangada aana ne hili.

63 De ahi ne daa ga maakau alaadeu dama daane,

gai alaadeu damaa hine gu dee maua i de hai bodu.

64 Olaadeu dangada haimeedabu ne maakau i de gadilaasa,

gai olaadeu bodu tee maua i de tangi.

65 Gai de Ia Aamua gu alahage ange hogi,

bei dagodo o taane mmahi e oo laa i dono senga.

66 Ia e hagamaakulu ono hagadaumee,

ma de hagadookaa gilaadeu ga hano ai.

67 Ia ne tili de hale o Joseph,

ia tee hili de aamuli o Ephraim;

68 aagai ia ne hili de aamuli o Judah,

ma de mounga go Zion, go de mommee oona e malangilangi ai.

69 Ia ne hagaduu dono hale dabu gi bei de mommee maolunga,

gai e bei henua i lalo, aana ne hagaduu laa gi dagodo ga hano ai.

70 Ia ne hili dono dangada hai hegau go David,

ga kave ia mai i denga buibui ssiibi,*

71 ma mai i de hagaloosi denga ssiibi ma alaadeu dama,

ga hai ia gi diiloo ange ono dangada go Jacob,

go de gau Israel ana dangada ne hili.

72 Gai David ne tilo ange gilaadeu i de lodo e heohi,

ma de dagi gilaadeu i dono lima labagau.

Psalm
<
78
>

*78:2 Mat 13.35

*78:12 Exo 7.8—12.32

*78:13 Exo 14.21-22

*78:14 Exo 13.21-22

*78:15 Exo 17.1-7; Num 20.2-13

*78:18 Exo 16.2-15; Num 11.4-23, 31-35

*78:24 John 6.31

*78:44 Exo 7.17-21

*78:45 Exo 8.1-6, 20-24

*78:46 Exo 10.12-15

*78:47 Exo 9.22-25

*78:51 Exo 12.29

*78:52 Exo 13.17-22

*78:53 Exo 14.26-28

*78:54 Exo 15.17; Josh 3.14-17

*78:55 Josh 11.16-23

*78:56 Jdg 2.11-15

*78:60 Josh 18.1; Jer 7.12-14; 26.6

*78:61 1 Sa 4.4-22

*78:70 1 Sa 16.11-12; 2 Sa 7.8; 1 Ch 17.7