1 De Maadua, denga huaahenua gu kage mai gi honga doo henua;

gilaadeu gu hai ma gu hakino gee doo temple dabu,

gai gilaadeu gu oha Jerusalem alodahi.*2 Ki 25.8-10; 2 Ch 36.17-19; Jer 52.12-14

2 Gilaadeu gu gaavange angaanga o oo dangada hai hegau gi denga manu llele gi gaimee ai,

gai gu gaavange angaanga o oo dangada dabu gi manu lodo henua.

3 Gilaadeu gu llingi denga dodo bei denga vai i Jerusalem alodahi,

gai gu deai donu dangada e danumia de gau maakau.

4 Gai gimaadeu gu ni mee e hakadanga ai dangada e paa mai gi gimaadeu,

gai gu hagangadi mee i daho dangada i omaadeu gaogao.

5 Tagi Maolunga, dee hee maa taulooloa?

Koe ga duudagi naa donu huu doo lili i gimaadeu ga hano ai?

Dee hee maa taulooloa de kona doo maagoda bei de ahi ula?

6 Koe gi lili i denga huaahenua e dee iloo goe,

ma denga nohoanga hodooligi e dee dalodalo adu gi de goe.

7 Go hiidinga gilaadeu gu daa dangada o Jacob,

ma de oha de mommee iai dono mommee noho.

8 Koe gi dee manadua omaadeu baubau i denga masavaa gu hulo,

gi hai baasi mai gi gimaadeu;

koe gi hagamoolau gi lodo aloha mai gi gimaadeu,

i hiidinga gimaadeu gu duasala mmao.

9 Balea mai gimaadeu, de Maadua demaadeu Ia Hagaola,

gi hagamahamaha ina ai doo ingoo;

hagaola ina gimaadeu ma de degi mai gi omaadeu haisala,

i hiidinga doo ingoo.

10 Gu aha gu hagataba ai denga huaahenua,

“I hee iai delaadeu Maadua?”

Haia gi gidee e gimaadeu dau sui ange hegau a denga huaahenua

i delaadeu daa oo dangada hai hegau!

11 Koe gi hagalaangona de tangi o dangada i lo te hale pono;

ma de hagaola gilaadeu gu hagamodu e daa gi maakau i doo lima mmahi.

12 Suuia ange hegau a dangada e paa mai gi gimaadeu gi hidu hanonga;

de Ia Aamua, ma de sui ange de hakadanga i de goe.

13 Gai gimaadeu, oo dangada, go ssiibi i dau mommee iai helii,

e hagaahe adu de abodonu ga hano ai;

gimaadeu e tuhi naa goe i denga atangada alodahi.