80
Ange gi tagi o taahili; gai e hua bei de leo o “Denga lilii o de hagatoo donu hagaheloongoi”. Se Psalm nii Asaph.
1 De Ia Hagaloosi o Israel, hagalaangona amaadeu muna,
koe, de ia e dagina Joseph bei de hagabuulingaa ssiibi!*Exo 25.22
go koe, de ia e noho laa i magavaa o luu cherubim,
hagaagona mai doo mahamaha.
2 Hagaagona ange oo mahi gi Ephraim ma Benjamin aama Manasseh;
humai hagaola ina gimaadeu.
3 De Maadua, ahe ange hagadanuaa ina gimaadeu;
koe gi abodonu mai gi gimaadeu, gi mouli ai gimaadeu!
4 Tagi Maolunga, de Maadua o denga hagabuulinga hebagi,
dee hee maa taulooloa doo lili i dalodalo a oo dangada?
5 Koe gu haangai ange gilaadeu i pelaoaa e hai i denga loimada;
koe gu hagaunu ange gilaadeu i loimada lagolago.
6 Koe gu hai gimaadeu gi se mee e hebagi ai dangada,
gai omaadeu hagadaumee e hakadanga i gimaadeu.
7 De Maadua o denga hagabuulinga hebagi,
ahe ange hagadanuaa ina gimaadeu;
koe gi abodonu mai gi gimaadeu, gi mouli ai gimaadeu!
8 Koe ne sigi mai dahi grapevine i Egypt,
koe ne aau gee denga huaahenua gai ga doo de grapevine laa.
9 Koe ne hagamalaelae de gelegele ga doo ai,
gai gu ssomo ono aga, gai de manu laa gu somo ga haoli honga de henua.
10 Dono malu gu haoli denga mounga,
gai ono laa gu haoli hogi denga cedar nnui.
11 Ono laa ne ssomo ga tae gi tai,
ono uli ne ssomo hogi ga tae gi ssaalingaa vai laa.*ssaalingaa vai laa e bei go Euphrates.
12 Gu aha goe gu oha iho ai naa ono buibui,
ma de hai gi maua e dangada alodahi
e seesee laa kilaa e de hagihagi ono hua?
13 Denga biigi lodo henua e oha de manu laa,
gai denga manu dolodolo e gai ono hua.
14 De Maadua o denga hagabuulinga hebagi, ahe mai!
Galo iho i de langi mage diiloo,
gai dagidiiloo de grapevine nei,
15 go de uli aau ne sigi mai ga doo,
gai go tama aau ne hai ga somo ga mmahi.
16 Dangada gu sele iho dau grapevine ma gu dudu i de ahi;
gai koe gi huli ange daia gilaadeu gi maakau i doo lili.
17 Aagai dugua ange doo lima gi honga o tangada i doo baasi madau,
go tama a tangada aau ne hai gi mmahi i oo hiidinga!
18 Gai gimaadeu e dee aahe ange naa donu e huuhuli gee i de goe;
hagaola ina gimaadeu, gai gimaadeu ga dalodalo adu gi de goe.
19 Tagi Maolunga, de Maadua o denga hagabuulinga hebagi,
ahe ange hagadanuaa ina gimaadeu!
Koe gi abodonu mai gi gimaadeu, gi mouli ai gimaadeu!