81
Ange gi tagi o taahili; e hua bei de leo o de Gittith.*Gittith se muna ange gi denga hai daahili. Se Psalm nii Asaph
1 Daahili ange gi de Maadua, odaadeu mahi, i de malangilangi;
hevaalogi duuhia de Maadua o Jacob i de malangilangi!
2 Langia dahi daahili, daalea de tambourine,
ma de hagadangidangi i de lyre aama de harp.
3 Ilihia de hanga manu i taonga o de duu de maasina i dai,
ma de honu de maasina, ma de laangi o taadeu daonga.*Num 10.10
4 I hiidinga se hainga gu hagasauaa ange gi Israel,
gai ni muna nii de Maadua o Jacob.
5 Ia ne hagasauaa ange gi Joseph de mee nei,
i de masavaa oona ne hano ai ga hebagi ange gi Egypt,
go de mommee amaadeu ne langona ai hanu muna amaadeu tigi iloo laa.
6 ⌊De Maadua ne hagadaba,⌋ “Au ne aau de mee daemaha i honga dono eu;
ma de kave gee de gede daemaha i lodo olaadeu lima.
7 Koe ne hagahi mai au i doo duasala, gai au ne hagaola goe;
au ne basa adu gi de goe mai i lo te hagausinga o de hatuli,
gai au ne hagatale oo dagodo i de vai go Meribah.*Exo 17.7; Num 20.13
Selah
8 Ogu dangada, nnoho mai gai au ga agoago adu goodou;
de gau Israel, mee naa goodou gi hagallongo mai gi de au!
9 Aude dugua dahi diinonga daudahi i oo daha,
aude daumaha ange gi dahi diinonga gee.*Exo 20.2-3; Deut 5.6-7
10 Go au Tagi Maolunga doo Maadua,
ne hagassao ina mai goe i de henua go Egypt.
Haangaa doo ngudu, gai au ga hhao mai.
11 Aagai ogu dangada tee hagallongo i agu muna;
de gau Israel tee daudali mai i de au.
12 Deelaa ai, au e dugu ange naa gilaadeu
gi daudali i alaadeu hagasaele hagamaolunga.
13 Mee naa gi hagallongo mai ogu dangada gi de au,
gai Israel gi daudali i ogu lodo!
14 E moolau naa donu dagu hagadee kii olaadeu hagadaumee,
ma de hebagi ange gi dangada e kino i gilaadeu.
15 Dangada e kino i Tagi Maolunga e maatagu naa i de ia,
gai delaadeu hagaduasala e dee ngado mai donu.
16 Aagai au e haangai adu naa goe i denga grain danuaa hugadoo,
ma de hai gi bosu goe i denga hooni o lo te baba.”