88
Se daahili. Se Psalm nii de aamuli o Korah. Ange gi tagi o taahili; e hua bei de leo o de Mahalath leannoth. Se Maskil nii Heman, ia se daane de aamuli o Ezrah
1 Tagi Maolunga, dogu Maadua, go koe dogu hagaola;
au e hagahi adu i de laangi ma de boo.
2 Haia gi dae age dagu dalodalo gi de goe,
gai huli mai hagalaangona dagu dangidangi.
3 I hiidinga au gu duasala mmao,
gai au gu baa ange donu gi de magau.
4 Au gu bei gilaadeu e loiho laa gi lo te geelonga o de magau;
au gu bei tangada gu deai laa ono mahi.
5 Au gu bei tangada gu dagodo laa i magavaa o de gau maakau,
ma tangada magau gu dagodo i lo te daanunga,
gai se dangada niiau gu dee manadua,
gai koe gu dee bale ange ia.
6 Koe gu dugu au i lo te geelonga maolalo hugadoo,
go de mommee gohu mmao ma de gelo.
7 Au gu langona iho de daemaha o doo bole,
gai koe gu hagaabulu au i au beau alodahi.
Selah
8 Koe gu hai ogu soa gi dee aanga mai gi de au;
koe gu hai au gi se mee niiolaadeu e kino ai.
Au gu bonodia ange ma gu dee maua i de sao mai;
9 luoogu mada gu baageaa i dogu duasala.
Tagi Maolunga, au e hagahi adu goe i laangi alodahi;
au e haalo adu dogu lima gi de goe.
10 E aha, koe e hagaago ange au hegau hagalele mouli gi de gau maakau?
E aha, de gau maakau e hiihidi age laa ga tuhi goe?
Selah
11 E aha, e maua e dahi i de tala dagodo o doo abodonu i lo te daanunga,
aabe go doo hai hegau i de muna abodonu i Abaddon?*Abaddon e bei go de mommee o de gau maakau.
12 E maua gi iloo au hegau hagalele mouli i de mommee gohu,
aabe go doo heohi i de henua o de gau ngalongalo?
13 Tagi Maolunga, au e dangi adu gi de goe;
au e dalodalo adu gi de goe i taiao.
14 Tagi Maolunga, gu aha goe gu tili ai naa ngau?
Gai gu aha gu hagammuni ai naa luoo mada i de au?
15 Mai i dogu gauligi gai au ne duasala ma de dai magau,
au ne duu ange gi au mee hagamaatagu gai gu deai sagu tali.
16 Koe ne haoli au i doo bole;
au mee hagamaatagu gu hebagi mai gi de au.
17 Gilaadeu e haoli au bei dagodo o tolona mai i taiao ga boo ai;
gilaadeu gu hagaabulu au.
18 Koe gu hai ogu soa ma ogu soa hagaaloha gi dee aanga mai gi de au;
go de gohu donu huu dogu soa.