89
Se Maskil nii Ethan, ia se daane de aamuli o Ezrah
1 Au e daahili i hiidinga de abodonu Tagi Maolunga, ga hano ai,
au e tala dagodo o doo hai hegau i de mee abodonu
i denga atangada alodahi.
2 I hiidinga doo abodonu e dagodo naa donu huu ga hano ai,
gai koe gu hagaduu gi makaga doo hai hegau i de muna abodonu i de langi.
3 Koe gu hagadaba, “Au gu hai dahi hagatoo donu hagaheloongoi madali de ia aagu gu hili,
au gu hagatoo donu ange gi David dogu dangada hai hegau:
4 ‘Au e gaavange naa gi doo hagadiilinga de nohoanga hodooligi ga hano ai,
ma de hai gi dagodo doo hodooligi i denga atangada alodahi.’ ” *2 Sa 7.12-16; 1 Ch 17.11-14; Psa 132.11; Acts 2.30
Selah
5 Tagi Maolunga, de langi gi duuhia au hegau hagalele mouli,
gai de gau dabu gi duuhia doo hai hegau i de mee abodonu!
6 Tagi Maolunga, goai e bei oo dagodo i de langi?
Tagi Maolunga, goai i de gau de langi e bei oo dagodo?
7 De Maadua se ia hagamadagu ange gi de hagabuulinga hagasaele dabu;
gai e hagamadagu ange i gilaadeu madali ia.
8 Tagi Maolunga, de Maadua o denga hagabuulinga hebagi, goai e bei goe?
Tagi Maolunga, koe e mmahi, ma de hai hegau i de muna abodonu.
9 Go koe e huahua i tai mmahi;
koe e hagamalino tai i de masavaa e beabeau ai.
10 Koe e hagabalaginagina Rahab bei de manu gu daa ma gu magau;
koe gu hagamavaevae saele oo hagadaumee i doo lima mmahi.
11 Niiou de langi, gai niiou hogi henua i lalo;
gai henua i lalo ma mee alodahi iai go koe ne haia.
12 Go koe ne haia ngaiho ma ngaage;
gai luu mounga go Tabor ma Hermon e tuhi goe i de malangilangi.
13 Koe e mmahi mmao;
gai doo lima madau gu haalo i doo sauaa.
14 Tagelo o doo nohoanga hodooligi go de heohi ma de hagamodu muna heohi;
gai koe e hai hegau i de abodonu.
15 Tagi Maolunga, e manuuia gilaadeu gu iloo de hevaalogi ga tuhi goe,
ma gilaadeu e seesee i de maalama i mada luoo mada.
16 Gilaadeu e tuhi doo ingoo mai i taiao ga boo ai,
ma de malangilangi i hiidinga doo heohi.
17 Go koe delaadeu mahamaha ma olaadeu mahi;
gai doo heohi gu hai ma gu hagadagadaga age omaadeu mmahi.
18 Tagi Maolunga, go koe demaadeu ia buibui,
gai go de Ia Dabu o Israel ne gaamai demaadeu hodooligi.
19 Madagidagi gai koe ne hai ange gi oo dangada dabu i de midi hagaago ange,
“Au gu bale ange dahi daane dau i de hebagi;
Au gu hagaamua dahi dama daane i magavaa o dangada.
20 Au gu gidee David, dogu dangada hai hegau;
ma gu hagasulu ia i de lolo dabu;*1 Sa 13.14; 16.12; Acts 13.22
21 gai ia e duu naa ga makaga i ssauaa o dogu lima,
dogu lima e hagammahi naa hogi ia.
22 Ono hagadaumee e dee kii i de ia,
gai tangada baubau e dee maua i de vaivai hai ia.
23 Au e hagabalaginagina naa ono hagadaumee i ono mada i mua
ma de daa gilaadeu e kino i de ia.
24 Au e hai hegau ange gi de ia i de mee abodonu ma de aloha,
gai au e hagaamua naa ia i ssauaa o dogu ingoo.
25 Au e hai naa ia gi huahua i tai
ma denga saalingaa vai i honga de henua.
26 Ia e hai mai naa gi de au, ‘Go koe dogu Damana,
go koe dogu Maadua, gai go de Baba makaga ma dogu Ia Hagaola.’
27 Gai au e hai naa ia go dagu dama madua,
gai go de hodooligi e maolunga hugadoo i henua i lalo.*Rev 1.5
28 Au e abodonu ange naa gi de ia ga hano ai,
gai dagu hagatoo donu hagaheloongoi ange gi de ia e dee sui naa donu.
29 Gai au e hai naa dono aamuli gi hodooligi ga hano ai,
gai dono nohoanga hodooligi e duudagi naa donu huu
i taulooloa de dagodo de langi i lunga.
30 Gai noo ana dama e tili dagu hainga
ma tee daudali i agu mee gu hagamodu;
31 noo gilaadeu e oha agu hainga gu hagasauaa
ma tee daohi agu hainga,
32 au e hagaduasala naa gilaadeu i de laagau i hiidinga olaadeu haisala,
ma de hagailiili gilaadeu i hiidinga olaadeu baubau;
33 aagai au e dee tuu naa donu dogu aloha i David,
aabe e hagahadu muna dogu hai hegau i de muna abodonu.
34 Au e dee oha naa donu dagu hagatoo donu hagaheloongoi,
aabe e sui agu muna gu lava i de tala.
35 Au ne hagatoo donu i dogu ingoo dabu i dahi hanonga,
gai au e dee hadu muna ange donu gi David —
36 bolo ono hagadiilinga e hodooligi naa donu ga hano ai,
gai dono nohoanga hodooligi e dee lilo naa donu i taulooloa de sobo age o de laa.
37 Gai e dagodo naa donu ga hano ai bei de maasina,
go de mee tala hagadonu i lo te langi i lunga.”
Selah
38 Aagai koe gu tili ma de kino i gimaadeu,
koe gu lili i de ia aau gu hagadabu i de lolo.
39 Koe gu oha dau hagatoo donu hagaheloongoi ange gi doo dangada hai hegau;
gai koe gu maga dono hau hodooligi gi lo te gelegele.
40 Koe gu oha de buibui o dono aduhale,
gai koe gu oha ono hale buibui makaga.
41 Dangada alodahi e seesee laa i kilaa gu gaiaa goloa iai,
gai dangada e paa ange gi kilaa gu doo mee ai.
42 Koe gu hai ono hagadaumee gi hagadee kii ina ia,
gai koe gu hai gi malangilangi ono hagadaumee.
43 Koe gu hai gi deai haigamaiana o dana gadilaasa,
gai koe tee hagabuni ange gi de ia i de hebagi.
44 Koe gu kave gee dono mahamaha,
ma de maga dono nohoanga hodooligi gi honga de gelegele.
45 Koe ne hai gi moolau dono madumadua;
gai koe ne hai gi kona dono dogaa.
Selah
46 Tagi Maolunga, dee hee maa taulooloa?
Koe ga mmuni naa donu i gimaadeu ga hano ai?
Dee hee maa taulooloa doo bole bei de ahi mmahi?
47 Tagi Maolunga, manadua dogu mouli e bodobodo,
gai ni haigamaiana aha dau hai dangada alodahi!
48 Goai tangada e dee duu ange gi de magau?
Gai goai e maua gi ola mai i ssauaa o de magau?
Selah
49 De Ia Aamua, i hee iai doo aloha ne aloha ange ai laa gi David i mua,
ma de hagatoo donu ange ai gi de ia i doo hai hegau i de muna abodonu?
50 De Ia Aamua, koe gi manadua
de hagadogaa ina o doo dangada hai hegau,
ma de daemaha o ogu lodo
i hiidinga hagammae manava a denga huaahenua soa,
51 ma de hagammae manava a oo hagadaumee, e Tagi Maolunga,
gilaadeu e hakadanga i de ia aau gu hagadabu i de lolo i mommee alodahi.
52 Duuhia Tagi Maolunga ga hano ai!
Amen gai Amen.