1 De Ia Aamua, gimaadeu e nnoho paba i oo daha

i denga atangada alodahi.

2 I mua de hai ga hanu mounga,

aabe go dau hai henua i lalo ma mee alodahi iai,

gai go koe de Maadua, mai i de masavaa e dee ngado mai

ga dae ai gi de masavaa e dee ngado mai.

3 Koe e hai dangada gi ahe ange gi de gelegele,

ma de hagadaba, “Dama a dangada, goodou aahe ange gi de gelegele.”

4 Gai de mano ngadau i oo daha

e bei de laangi go anaahi gu ui laa,

aabe go dahi boo daudahi.*2 Pe 3.8

5 Koe e kave mouli o dangada bei dagodo o tolona;

olaadeu mouli e bei dagodo o de midi bodobodo

ma denga helii hoou e ssomo age laa i taiao:

6 gilaadeu e matili age ga ssomo danuaa i taiao,

gai e mmade ga pobo i de ahiahi.

7 Gimaadeu gu hagaduasala i doo lili,

gai gimaadeu gu maatagu i doo bole.

8 Koe e gidee omaadeu baubau,

gai omaadeu haisala e hagammuni laa

e daakodo donu i mada luoo mada.

9 Laangi alodahi o omaadeu mouli e moolau naa donu de odi i doo lili,

gai omaadeu ngadau e mouli ai e odi naa bei dagodo o de manava i lunga.

10 Gai de lagolago o odaadeu ngadau e mouli ai se madahidu,

aabe e madavalu, noo gidaadeu e mmahi;

aagai laangi laa iai de hai ngadaa ma taemaha,

gai e moolau donu de odi, gai gimaadeu e lele ga hulo.

11 Goai e donu ange gi mahi o doo lili?

Gai doo lili e laumalie mmao bei de madagu i de goe.

12 Agoagona mai gimaadeu de dau taelodo o omaadeu laangi e mouli ai,

gi heiangi ai omaadeu lodo.

13 Tagi Maolunga, ahe mai! Dee hee maa taulooloa?

Lodo aloha ange gi oo dangada hai hegau.

14 Hagadanuaa ina gimaadeu i doo abodonu i taiao,

gi llodo danuaa ai gimaadeu ma de malangilangi i taulooloa omaadeu mouli.

15 Koe gi hagamalangilangi ina gimaadeu gi bei de lagolago laangi aau ne hagaduasala ai gimaadeu,

gai gi bei de lagolago ngadau omaadeu ne duasala ai.

16 Hagaagona ange doo sauaa gi oo dangada hai hegau,

ma au hegau hagalele mouli gi alaadeu dama.

17 De abodonu o de Ia Aamua taadeu Maadua gi dagodo i omaadeu daha,

gai hagassula ina amaadeu hegau alodahi;

uaa, hagassula ina amaadeu hegau alodahi.