1 Tangada e mmuni i lo te buibui a de Ia Maolunga Mmao laa,

ma de noho i lalo de malu o de Ia Mmahi Mmao laa,

2 e maua i de hai ange gi Tagi Maolunga,

“Go koe dogu buibui ma dogu hale hagaloosi makaga,

ma dogu Maadua, au e hagadonusia goe.”

3 Ia e hagaola naa goe mai i hai ngadaa e dee gidee laa

ma mai i de mee hagamaakau.

4 Ia e haoli naa goe i lalo ono hulu manu

ma de buibui goe i lalo luoono bakau;

dono hai hegau i de muna abodonu go doo mee hungihungi ma doo buibui.

5 Gai koe e dee madagu naa donu i de mee hagamaatagu i de boo,

ma tao o de mee hholu e tili laa i de laangi,

6 aabe go de mee hagamaakau e hano saele laa i lo te gohu,

aama de mee e daia dangada ga maakau i de odea.

7 E mano naa dangada e maakau i oo gaogao,

gai e dahisemada e maakau i doo baasi madau,

aagai de magau e dee baa naa donu gi de goe.

8 Koe e galo ange naa donu huu

ga tilo de hagaduasala o de gau baubau.

9 Noo koe e hai Tagi Maolunga go doo buibui,

gai de Ia Maolunga Mmao laa go doo mommee e nnoho ai;

10 gai e deai naa donu se baubau e baa i de goe,

aabe se mee hagamaakau e humai gi doo mommee noho.

11 Gai ia e tala ange naa gi ono dangada de langi oo dagodo,

gai gilaadeu ga hagaloosi adu ai goe i mommee alodahi.*Mat 4.6; Luke 4.10-11

12 Gai gilaadeu ga sigo ai goe i olaadeu lima,

gi dee duugia ai doo vae i dahi hadu.

13 Koe e dagadagahi naa de laiono ma de labodo,

ma de laiono mmahi aama de labodo hagammau gi lalo oodou vae.*Luke 10.19

14 ⌊E hagadaba de Maadua,⌋ “Go hiidinga ia e aloha i de au, au e hagaola naa ia;

Au e buibui naa ia, i hiidinga ia e iloo ogu dagodo.

15 Au e basa ange naa gi de ia,

i de masavaa aana e hagahi mai ai au;

au e noho naa i ono daha i de masavaa hai ngadaa,

gai au e hagaola naa ia ma de hagadubu ia.

16 Au e hagamanuuia naa ia i de mouli daulooloa,

ma de hagaago ange dagu hai e hagaola ai ia.”