1 Se mee danuaa de tuhi Tagi Maolunga,

ma de tuhi doo ingoo i taahili, de Ia Maolunga Mmao laa,

2 ma de tala hagadanuaa dagodo o doo abodonu i taiao,

aama dagodo o doo hai hegau i de mee abodonu i de boo,

3 ma de hagadangidangi i de lute ma de harp

aama taahili ga hagadangidangi i de lyre.

4 Tagi Maolunga, koe gu hai au gi malangilangi i au hegau,

deelaa ai, au e daahili i dogu malangilangi i au hegau.

5 Tagi Maolunga, au hegau e maolunga mmao,

gai au maanadu e gelo mmao!

6 Tangada lodo senga e dee iloo mee nei,

tangada senga e dee donu ange aagena,

7 gai ga ssomo age naa donu de gau baubau bei denga helii,

gai alodahi e haia de baubau e hagadagadaga age,

gai gilaadeu e daa naa ga maakau ga hano ai.

8 Aagai koe, Tagi Maolunga, e hagaamua naa ga hano ai.

9 Tagi Maolunga, galo ange diiloo oo hagadaumee;

tilo, oo hagadaumee e maakau naa donu;

gai gilaadeu alodahi e haia de baubau e mavaevae saele naa.

10 Gai koe gu hai au gi mmahi bei de manu aada;

koe gu hagasulu au i de lolo hoou.

11 Au gu gidee de hagadee kii ina o ogu hagadaumee;

gai au gu langona de maakulu o de gau baubau e hebagi mai gi de au.

12 Tangada heohi e bei de nui somo danuaa,

gai ia e somo bei dahi cedar o Lebanon.

13 Gilaadeu e doo i lo te hale o Tagi Maolunga,

gilaadeu e ssomo danuaa i lodo buibui o taadeu Maadua.

14 Gilaadeu e duudagi naa donu huu de hhua

i de masavaa olaadeu gu madumaatua ai,

gilaadeu e duudagi naa donu huu de lau kohu ma de ssomo danuaa,

15 e hagaago mai ai bolo Tagi Maolunga e heohi;

go ia dogu baba makaga,

gai e deai donu se baubau daudahi i ono lodo.