1 Tagi Maolunga se Maadua e suuia ange de baubau.

De Maadua e suuia ange de baubau,

hagaagona mai dono mahamaha.

2 De ia hagamodu muna o henua i lalo,

hidi age, hagaduasala ina de gau hagamaolunga!

3 Tagi Maolunga, dee hee maa taulooloa,

dee hee maa taulooloa de malangilangi o de gau baubau?

4 Gilaadeu e pasa hagamaolunga,

dangada alodahi e haia de baubau e pasa hagamaolunga.

5 Tagi Maolunga, gilaadeu e vaivai hai doo huaadangada,

gilaadeu e hagaduasala oo dangada.

6 Gilaadeu gu daa denga haahine gu maakau olaadeu bodu ma de gau henua gee,

aama denga gauligi gu deai olaadeu damana.

7 Gilaadeu e hagataba, “Tagi Maolunga e dee gidee,

de Maadua o Jacob e dee anga mai donu.”

8 Goodou gi tonu ange, de gau llodo ssenga i magavaa o dangada;

de gau llodo ssenga, go aahee maa oodou e heiangi ai?

9 E aha, e longoduli de ia ne haia talinga?

Gai de ia ne haia de ganomada e dee gide hogi?

10 E aha, de ia e haelea denga huaahenua e dee hagaduasala naa gilaadeu?

Gai de ia e agoagona ange tangada e dee iloo mee?

11 Tagi Maolunga e iloo maanadu a tangada;

ia e iloo bolo gilaadeu e bei dagodo o de madangi o de manava.*1 Co 3.20

12 Tagi Maolunga, e manuuia tangada aau e haele,

ma tangada aau e agoago ange i au hainga;

13 koe e hai ia gi noho baba i laangi hai ngadaa,

ga dae ai gi de geli de haonga ange gi tangada baubau.

14 Tagi Maolunga e dee tili donu ono dangada,

ia e dee tili donu ana dangada gu hili.

15 Gai de hagamodu muna heohi e ahe ange naa ga hagahai hegau,

gai gilaadeu alodahi e heohi olaadeu lodo e hai hegau ai naa.

16 Goai e balea mai au e hebagi ange gi de gau baubau?

Goai e hidi age e balea mai au e hai baasi ange ai

gi gilaadeu e haia de baubau?

17 Noo Tagi Maolunga tee bale mai au,

gai ne moolau donu dogu noho i de mommee e dee muu ai dangada.

18 Au ne maanadu, “Dogu vae ne sege,”

gai doo abodonu, Tagi Maolunga, ne daohi au gi dee baguu.

19 De masavaa ne kona ai dogu manavasaa,

gai doo lodo aloha ne hagaaneane ogu lodo.

20 E aha, e maua e dahi dagi baubau i de hagabuni adu gi de goe —

go de ia e haia de hagamodu dee heohi gi se hainga?

21 Gilaadeu e hagabuni e hai baasi ange gi tangada heohi,

ma de hagamodu e daa gi magau tangada e dee haisala.

22 Aagai Tagi Maolunga go dogu mommee buibui makaga;

dogu Maadua go de baba oogu e mmuni ai.

23 Ia e hagao ange naa olaadeu baubau,

ma de daa gilaadeu gi maakau i hiidinga olaadeu haisala;

Tagi Maolunga taadeu Maadua e daa naa donu gilaadeu gi odi.