95
1 Loomai, gidaadeu ga daahili ange gi Tagi Maolunga i de malangilangi;
gidaadeu ga hevaalogi e tuhi de Baba e hagaola ina gidaadeu.
2 Gidaadeu ga hulo gi ono mada i mua e hagaahe ange ai de abodonu,
ma de hagaamua ia i taahili tuhi.
3 Go hiidinga Tagi Maolunga se Maadua maolunga,
gai se Hodooligi e maolunga ange i denga diinonga alodahi.
4 Ia e daohi i lo tono lima denga mommee kelo o henua i lalo,
gai niiana denga mounga maolunga.
5 Niiana tai, i hiidinga go ia ne haia,
gai go ia ne haia de henua mmasa.
6 Loomai, gidaadeu ga ino gi lalo e daumaha,
gidaadeu ga duuduli i mada luu mada o Tagi Maolunga, de ia ne haia gidaadeu.
7 I hiidinga go ia taadeu Maadua,
gai gidaadeu go ana dangada i dana mommee iai helii,
ma de hagabuulingaa ssiibi aana e tilo ange.*Heb 3.15; 4.7 *Heb 3.7-11
Anailaa nei, noo goodou gu langona dono leo,
8 gai goodou gi dee hagamakaga ina oodou lodo,
bei oodou mee ne hai i Meribah,
aama mee ne hai i de laangi i de vao o Massah,*Exo 17.1-7; Num 20.2-13
9 go de masavaa a oodou dubuna madagidagi ne hagatale ai au ma de usuusu mai au,
gai gilaadeu gu gidee donu agu hegau hagalele mouli.
10 Au ne lili i e madahaa ngadau i de atangada laa;
au ne hagadaba, “Gilaadeu se huaadangada e daahuli gee i olaadeu lodo,
gilaadeu e dee iloo ogu dagodo.”
11 Gai au gu hagatoo donu i dogu lili,
“Gilaadeu e dee ulu donu i dagu hagamaabunga.” *Num 14.20-23; Deut 1.34-36; 12.9-10; Heb 4.3-5