1 Go Tagi Maolunga e hodooligi,

denga huaadangada gi bolebole;

ia e noho i magavaa luu cherubim;

henua i lalo gi ngalungalue.*Exo 25.22

2 Tagi Maolunga e maolunga i Zion;

ia e maolunga ange i denga huaadangada alodahi.

3 Dangada gi duuhia doo ingoo maolunga ma de hagamaatagu!

Ia e dabu mmao.

4 De Hodooligi e mmahi, gai e lodo i de hagamodu muna heohi;

koe gu hagaduu gi makaga de hagamodu muna heohi,

gai koe gu hagamodu muna o Jacob i de heohi.

5 Hagaamua ina Tagi Maolunga taadeu Maadua,

gai ino i gaogao luoono vae daumaha ange gi de ia!

Ia e dabu mmao.

6 Moses ma Aaron ni dangada haimeedabu hogi niiona,

Samuel se dangada hogi e dalodalo ange gi de ia.

Gilaadeu nei ne dalodalo ange gi Tagi Maolunga,

gai ia ne basa ange gi alaadeu dalodalo.

7 Ia ne basa ange gi gilaadeu i lo te duludulu hagausinga;

gilaadeu ne daohi ana muna, aama ana hainga gu hagasauaa ange gi gilaadeu.*Exo 33.9

8 Tagi Maolunga, go demaadeu Maadua,

koe ne basa ange gi gilaadeu;

koe go de Maadua ne degi ange laa gi gilaadeu,

aagai ne hagaduasala gilaadeu i alaadeu hegau baubau.

9 Hagaamua ina Tagi Maolunga taadeu Maadua,

gai daumaha ange i dono mounga dabu;

go hiidinga Iahweh taadeu Maadua e dabu.