1 Au e daahili i hiidinga doo abodonu ma dau hagamodu heohi,

Tagi Maolunga, au e daahili ma de tuhi goe.

2 Au e dagitilo naa donu, gi dee haisala ai au;

go aahee maa oou e humai ai gi ogu daha?

Au e hai hegau naa i de lodo se muna abodonu i dogu hale.

3 Au e dee dugu naa donu dahi mee hakino gee i mada luoogu mada.

Au e kino i hegau a dangada e daahuli gee i de goe;

au e dee daudali ange donu i alaadeu dahulinga.

4 Au e aau gee i ogu daha de lodo hakino gee;

au e dee hai hegau donu i de baubau.

5 Au e daa naa gi magau

tangada e hagabaubau ina dahi dangada;

au e dee golomagi naa donu ogu lodo

ange gi tangada e galo hagamaolunga ma de lodo maolunga.

6 Au e daumada gilaadeu e hai hegau i de muna abodonu i honga de henua,

gai gilaadeu ga nnoho ai i ogu daha.

Tangada e dee haisala i dono hai e hai hegau ai,

go ia e hai hegau mai gi de au.

7 E deai donu se dangada e hai hegau hagasenga

e maua i de noho i dogu hale;

gai e deai donu se dangada hadu muna

e maua i de noho madali au.

8 Denga daiao alodahi gai au e daa naa gi maakau

de gau baubau alodahi i honga de henua,

ma de hai gi deai dangada baubau

i de aduhale o Tagi Maolunga.