1 Tagi Maolunga, hagalaangona dagu dalodalo;

hagalaangona dogu dangi adu gi de goe i de bale.

2 Koe gi dee hagamuunia luoo mada i de au i de masavaa oogu e duasala ai.

Hulia mai doo dalinga gi de au;

hagamoolau basa mai gi de au, i de masavaa aagu e hagahi adu ai goe.

3 Dogu mouli e moolau de odi bei dagodo o de useahi,

gai ogu ivi e vvela bei dagodo o de ahi.

4 Ogu lodo e bei denga helii gu duuduu laa ma gu mmae,

au gu ngalo de gaimee.

5 Go hiidinga de kona dogu gonogono,

au gu ni gili donu huu ma ivi.

6 Au gu bei de owl lodo henua;

ma de owl i denga mommee gu maoha laa.

7 Au gu dee maua i de seni,

au gu bei dahi manu lele e noho sogosogo laa i tua de hale.

8 Ogu hagadaumee e hagangadi mee au mai i taiao ga boo ai;

dangada e hakadanga i de au

e hai dogu ingoo gi se muna hagamalaia.

9 Agu gai go denga mama o de gelegele,

ogu loimada e ssali ange gi lodo agu mee unu,

10 go hiidinga koe gu bole mmao;

koe gu poo au ma gu maga iho gi honga de gelegele.

11 Ogu laangi e mouli ai gu bei de malu o de ahiahi;

au gu mmae bei denga helii.

12 Aagai koe, Tagi Maolunga, e hodooligi ga hano ai;

doo ingoo e dee ngalo naa donu i daho denga atangada alodahi.

13 Koe e hidi age naa ga lodo aloha ange gi Zion;

i hiidinga gu dae doo masavaa e abodonu ange ai,

gai gu dae mai de masavaa gu hagailonga laa.

14 Go hiidinga hadu o Zion ni mee e hagaaloha ange gi oo dangada hai hegau,

gai gilaadeu e hinangalosaa i de mama o dono gelegele.

15 Denga huaahenua e maatagu naa i Tagi Maolunga,

denga hodooligi alodahi o henua i lalo e maatagu naa i doo mahamaha.

16 Go hiidinga Tagi Maolunga e ahe ange naa ga hagaduu age Zion;

ia e hagasula mai naa i dono mahamaha.

17 Ia e basa ange naa gi dalodalo a de gau hagaau aloha,

gai ia e dee hagangadi mee alaadeu dangidangi.

18 Siia muna nei gi daakodo ange gi denga atangada e loomai,

gi duuhia ai e dangada e haanau i muli mai Tagi Maolunga.

19 Ia e galo iho i dono mommee dabu maolunga,

Tagi Maolunga e galo iho i de langi ga tilo honga henua i lalo,

20 ga hagallongo de tangi o dangada i lo te hale pono

ma de hagaola gilaadeu gu hagamodu e daa gi maakau.

21 Gai gilaadeu ga tala ai de ingoo o Tagi Maolunga i Zion,

gai gi duuhia ai ia i Jerusalem,

22 i de masavaa o denga huaadangada ma denga hodooligi

e hagabuni ai e daumaha ange ai gi Tagi Maolunga.

23 Ia ne tuu mai ogu mahi i de masavaa oogu e dama daane ai,

gai ne hai gi sogoisi laangi oogu e mouli ai.

24 Au ne hagadaba, “Dogu Maadua,

koe gi dee gaavee gee au i dogu masavaa e dama daane ai,

gai koe e mouli donu i denga atangada alodahi.

25 Koe ne hagadagodo tagelo o henua i lalo i taamada age,

gai de langi go koe ne haia i luoo lima.*Heb 1.10-12

26 Mee nei e llilo naa donu, aagai koe e noho ga hano ai;

gilaadeu e hulo naa ga duai bei de malo.

Koe e sui naa gilaadeu bei de malo laa daha,

gai gilaadeu e tili gee naa.

27 Aagai koe go tagodo mau donu huu,

gai oo ngadau e dee ngado mai donu.

28 Dama a oo dangada hai hegau e nnoho paba naa,

gai olaadeu aamuli e dee llilo naa donu mai i mada luoo mada.”