1 Dogu hagasaalunga, koe gi duuhia Tagi Maolunga,

gai ogu lodo alodahi gi duuhia dono ingoo dabu.

2 Dogu hagasaalunga, koe gi duuhia Tagi Maolunga,

gai koe gi dee ngalo dono abodonu.

3 Ia e degi adu gi oo baubau alodahi,

ma de hagaieiangi oo magi alodahi;

4 ia e hagaola doo mouli mai i lo te geelonga o de gau maakau,

ma de hagahau goe i dono abodonu ma dono lodo aloha.

5 Ia e hagadanuaa goe i denga mee danuaa,

deelaa ai, koe e ahe ange ga mmahi bei de igele.

6 Tagi Maolunga e hai hegau i de heohi

ma de hagamodu muna o dangada alodahi e vaivai haia.

7 Ia ne hagaago gi Moses dagodo o ono haiava,

gai ne hagaago ange gi de gau Israel dagodo o ana hegau.

8 Tagi Maolunga e lodo aloha ma de degi,

ia e dee moolau dono lili, gai e abodonu mmao.*Jms 5.11

9 Ia e dee hagabaubau i masavaa alodahi,

gai e dee golo age donu dono lili ga hano ai.

10 Ia e dee hagaduasala gidaadeu gi bei odaadeu haisala,

aabe hagao mai gidaadeu gi bei de lagolago odaadeu baubau.

11 Gai dono lodo aloha ange gi gilaadeu e maatagu i de ia,

e bei de mmao o de langi mai i henua i lalo.

12 Gai ia gu hagammao odaadeu haisala mai i gidaadeu

bei de mmao o dua mai i dai.

13 Gai Tagi Maolunga e lodo aloha ange gi gilaadeu e maatagu i de ia,

bei dagodo o tamana e lodo aloha ange laa gi ana dama.

14 Go hiidinga ia e iloo odaadeu dagodo;

ia e manadua bolo gidaadeu ni mama.

15 Dagodo o tangada, ono laangi e bei laangi o denga helii;

ia e bei huaala i lo te duu malaelae;

16 ga ssau mai naa huu de madangi, gai ia gu ilihia ga dee maleva,

gai gu deai donu sono duulanga.

17 Aagai de abodonu o Tagi Maolunga se mee ange gi gilaadeu e maatagu i de ia,

mai i de masavaa e dee ngado mai ga dae ai gi de masavaa e dee ngado mai,

gai dono heohi e dohu ange gi denga atangada alodahi,

18 ma ange gi gilaadeu e daohia dana hagatoo donu hagaheloongoi,

ma de hagamaanadu ana hainga.

19 Tagi Maolunga gu hagaduu dono nohoanga hodooligi i de langi,

gai dono nohoanga hodooligi e dagi mee alodahi.

20 Duuhia Tagi Maolunga, goodou ono dangada de langi,

go goodou de gau mmahi e haia ono lodo,

ma de daudali i ana muna.

21 Duuhia Tagi Maolunga, goodou ono hagabuulinga hebagi alodahi i de langi,

go goodou ono dangada hai hegau e haia ana ono lodo.

22 Duuhia Tagi Maolunga, ana hegau alodahi,

i mommee alodahi oona e hodooligi ai.

Duuhia Tagi Maolunga, dogu hagasaalunga!