104
1 Dogu hagasaalunga, hagadegi ina Tagi Maolunga.
Tagi Maolunga, dogu Maadua, koe e maolunga mmao;
koe e gahu i de mahamaha ma de hagadubu.
2 Ia e gahu i de maalama bei de malo;
ia e doha de langi bei de hale malo,
3 ma de hagatau dogai o dono aabi i lunga i honga denga vai.
Ia ne hai dono hada hebagi i denga giliiga,
gai ne gage i honga luu bakau o de madangi.
4 Ia ne hai denga madangi go ono dangada hagailoo,
gai denga uila go ono dangada hai hegau.*Heb 1.7
5 Koe ne hagaduu henua i lalo i honga ono dagelo,
gai e dee maua naa donu i de hagangalue.
6 Koe ne haoli henua i lalo i tai bei de malo;
gai lausedi gu haoli ulu denga mounga.
7 Gai denga lausedi ne saavini ga hulo gee i dau masavaa ne hagasee ai;
gilaadeu e ssali ga hulo i de babaa o au hatuli.
8 Gilaadeu ne loage laa honga denga mounga,
ma de loiho gi lodo geelonga,
go dau mommee gu hagailonga ange gi gilaadeu.
9 Koe ne hagailonga ono goinga gi dee hano ai tai gi ui i kilaa;
gai tai e dee ahe ange naa donu e haoli de henua.
10 Koe ne hai denga vai gi ssali iho gi lodo mommee kelo,
gai denga saalingaa vai nei go magavaa denga mounga iai.
11 Vai nei e hagaunu ai manu dolodolo alodahi i lodo henua;
denga donkey gu boobosu i de unu ai.
12 Denga manu llele gu hai olaadeu hoohanga i gaogao denga vai,
gai gilaadeu e koo i magavaa laa o denga manu ssomo.
13 Koe e hagamaluulu denga mounga i vai mai doo aabi maolunga;
gai henua i lalo e hagadanuaa i hua o au hegau.
14 Ia e hai gi ssomo denga helii ange gi denga manu,
gai e hai dangada gi bolibolia ange denga manu ssomo vaaligiligi,
gi hanu gai e maua mai i de gelegele,
15 ma uvaini e hagamalangilangi ai tangada,
ma lolo e hulu ai luoono mada gi malamalama,
aama gai e hagammahi ai de angaanga o tangada.
16 Manu ssomo a Tagi Maolunga e hagamaluulu i vai lagolago,
go denga cedar o Lebanon aana ne doo laa.
17 Denga manu llele e hai olaadeu hoohanga i kilaa,
gai de stork e hai dono hale i lo tenga fir.
18 Denga mounga maolunga ni mee ange gi denga guudi;
gai lodo hadu se mommee nnoho niio denga rock badger.
19 Koe ne hai de maasina e hagailonga ai denga masavaa i lo te ngadau,
gai de laa e iloo de masavaa oona e danu ai.
20 Koe e hai gi humai de gohu, gai gu boo de mee,
gai denga manu lodo henua ga sasao mai.
21 Denga laiono mmahi e hagangolo ange gi alaadeu manu e gai,
ma de ssala ai alaadeu gai mai i daho de Maadua.
22 Gai de masavaa naa huu e sobo age ai de laa,
gai gilaadeu ga ahe gi lodo olaadeu haonga ga nnoho ai.
23 Tangada e hano ga hai ana hegau,
gai ia e hai hegau ga dae ai gi de ahiahi.
24 Tagi Maolunga, e lagolago mmao au hegau ne hai!
Koe ne hai mee alodahi i de heiangi;
henua i lalo gu honu i au mee ne hai.
25 Tai e laumalie ma de lahalaha,
gai iai denga hagadaagangaa manu lagolago mmao,
manu vaaligiligi aama manu nnui.
26 Gai go kilaa o denga vaga e dele saele ai,
gai dau Leviathan ne hai laa e hagadaahao saele i kilaa.*Job 41.1; Psa 74.14; Isa 27.1
27 Mee alodahi e tali adu goe,
gi gaavange alaadeu gai i de masavaa heohi.
28 Koe e gaavange alaadeu gai, gai gilaadeu ga hagabudu;
koe e hhola doo lima, gai gilaadeu gu boobosu i de gai mee danuaa.
29 Koe ne hagammuni luoo mada, gai gilaadeu gu maatagu;
noo koe gu kave olaadeu manava, gai gilaadeu gu maakau,
ga aahe ange gi de gelegele.
30 De masavaa aau ne gaavange ai doo Hagasaalunga,
gai gilaadeu gu mouli;
gai koe e hagahoou honga de gelegele alodahi.
31 De mahamaha o Tagi Maolunga e dagodo ga hano ai,
gai Tagi Maolunga gi malangilangi i ana hegau gu hai;
32 henua i lalo e bolebole, i dono galo ange aagena;
denga mounga e buu ai de useahi, i dono poo ange aagena.
33 Au e daahili ange gi Tagi Maolunga i taulooloa dogu mouli;
au e tuhi dogu Maadua i taahili i dogu masavaa e mouli ai.
34 Gai agu dalodalo gi hagamalangilangi ina ia;
gai au e malangilangi i Tagi Maolunga.
35 Aagai de gau haisala i henua i lalo gi odi i de maakau,
gai de gau baubau gi dee maaleva i kilaa.
Dogu hagasaalunga, koe gi hagadegi ina Tagi Maolunga.
Duuhia Tagi Maolunga!*Duuhia Tagi Maolunga: de muna Hebrew go Hallelujah.