De Beebaa Dabu Psalm 105

105

1 Hagaahea ange de abodonu gi Tagi Maolunga,

dalodalo i dono ingoo;

daalaa dagodo ana hegau i daho denga huaahenua.

2 Daahili ange gi de ia i taahili tuhi,

daalaa dagodo o ana hegau hagalele mouli alodahi.

3 Hagamahamaha ina dono ingoo dabu;

alodahi e saalaa Tagi Maolunga gi malangilangi!

4 Saalaa Tagi Maolunga ma ono mahi;

saalaa ia i masavaa alodahi.

5 Manadua ana hegau hagalele mouli,

ana sauaa ma ana hagamodu gu tala.

6 De aamuli o Abraham, dono dangada hai hegau,

de hagadiilinga o Jacob, go dangada aana gu hili!

7 Ia go Iahweh taadeu Maadua;

ana hagamodu muna e hai ange gi henua i lalo alodahi.

8 Ia e manadua dana hagatoo donu hagaheloongoi ga hano ai,

ma ana muna gu tala, ange gi e mano atangada,

9 go dana hagatoo donu hagaheloongoi ange gi Abraham,

ma dana hagatoo donu ange gi Isaac.*

10 Ia ne hai de hainga nei gi too donu ange gi Jacob,

ma de hai dahi hagatoo donu hagaheloongoi ange gi Israel ga hano ai:*

11 “Au e gaavadu naa gi de goe de henua go Canaan

e hai ai doo mommee e henua ai.”

12 De masavaa olaadeu goi sogoisi ai,

e dee dau, gai ni dangada henua gee i de henua laa,

13 gilaadeu ne silivaahea saele i denga huaahenua,

mai i dahi nohoanga hodooligi gi dahi nohoanga hodooligi.

14 Gai ia tee dugu ange dahi gi hagaduasala ina gilaadeu,

gai ne hagasee denga hodooligi i olaadeu hiidinga, ga hai ange,*

15 “Goodou e dee poo ange gi gilaadeu aagu gu hagadabu i de lolo,

gai gi dee hagammae ina ogu pelaabisi.”

16 Ia ne hai gi humai de onge gi honga de henua,

gai ne hai gi deai alaadeu gai;*

17 ia ne kave dahi gi hano i olaadeu mada i mua,

go Joseph, ne hagao ina laa gi daha bei tangada hai hegau.*

18 Gilaadeu ne hagammae luoono vae i mee noonooa baalanga,

gai ne hagaulu ange dono ua gi denga mee noonooa iron,*

19 ga dae ai gi de hagassula ana muna gu lava i de tala,

muna a Tagi Maolunga ne hagatale ono dagodo.

20 De hodooligi ne aalu ga dugu ia gi hano,

tagi o dangada ne hai ia gi ilaage.*

21 Ia ne hai ia go tangada aamua i dono hale alodahi,

gai go tagi o ana mee alodahi;*

22 gai ia ga agoago ange ai de gau aamua alodahi bei dono hai e lodo ai,

ma de agoago ange ai denga dagi i de iloo mee.

23 Gai Israel ne humai hogi gi Egypt;

Jacob ne noho gaainga i de henua o Ham.*

24 Gai Tagi Maolunga ne hai ono dangada gi hagadili gi soa mmao,

gai gilaadeu gu mmahi ange i olaadeu hagadaumee.*

25 Ia ne hai gi kino gilaadeu i ono dangada,

ma de vaivai daakodo ange gi ogu dangada hai hegau.

26 Ia ne kave Moses, dono dangada hai hegau,

ma Aaron, taane aana gu hili.*

27 Gilaau ne hai ana hegau hagalele mouli i olaadeu magavaa,

ma denga sauaa i de henua o Ham.

28 Ia ne hai gi humai de gohu gi haolia honga de henua;

gai gilaadeu ne hai baasi ange gi ana muna.*

29 Ia ne hai alaadeu vai ga ni dodo,

gai alaadeu mamu gu maakau.*

30 Delaadeu henua gu honu i denga kailu,

gai ne ulu hogi i lodo aabi o olaadeu hodooligi.*

31 Ia ne tala de muna, gai gu loomai denga lango lagolago,

ma manu vaaligiligi hakadigadi gi honga delaadeu henua.*

32 Ia ne hagamalili iho denga dibadibaa haisi bei de langi pala,

ma de hai gi dabadaba denga uila i honga delaadeu henua.*

33 Gai ia ne hadihadi iho alaadeu veelengaa grape ma denga fig,

ma manu ssomo alodahi i delaadeu henua.

34 Ia ne tala de muna, gai gu loomai denga itebuubuu,

ni itebuubuu lagolago e dee maua i de dau;*

35 denga itebuubuu ne gai denga manu ssomo i honga delaadeu henua,

ma de gai denga hua i honga olaadeu gelegele.

36 Ia ne daa ga maakau denga ganimua daane i delaadeu henua,

go denga dama ne haanau

i de masavaa olaadeu e dama daane ai.*

37 Gai ia ne hagassao mai de gau Israel ma alaadeu selevaa ma goolo,

gai teai donu se gilaadeu ne magi.*

38 Egypt gu malangilangi i delaadeu hulo gee,

go hiidinga de henua gu maatagu mmao i gilaadeu.

39 Ia ne hai dahi giliiga ga haoli ai gilaadeu,

gai ne hai dahi ahi gi hagamaalama ina gilaadeu i de boo.*

40 Gilaadeu ne dangidangi ange, gai ia ga gaamai denga quail,

ma de hai gi boobosu gilaadeu i gai mai i de langi.*

41 Ia ne hhuge de baba, gai gu sali mai ai denga vai;

gai gu bei dahi saalingaa vai i de vao.*

42 Gai ia e manadua dana hagatoo donu dabu

ange gi dono dangada hai hegau go Abraham.

43 Ia ne hagassao mai ono dangada i de lodo malangilangi,

go ono dangada ne hili i de lodo danuaa.

44 Ia ne gaavange gi gilaadeu henua o denga huaahenua,

gilaadeu ne kave mee a dangada ne hai hegau ange aagena,*

45 gai gilaadeu ga daohi ai ana muna gu hagasauaa,

ma de daudali i ana hainga.

Duuhia Tagi Maolunga!*

*105:9 Gen 12.7; 17.8; 26.3

*105:10 Gen 28.13

*105:14 Gen 20.3-7

*105:16 Gen 41.53-57

*105:17 Gen 37.28; 45.5

*105:18 Gen 39.20—40.23

*105:20 Gen 41.14

*105:21 Gen 41.39-41

*105:23 Gen 46.6; 47.11

*105:24 Exo 1.7-14

*105:26 Exo 3.1—4.17

*105:28 Exo 10.21-23

*105:29 Exo 7.17-21

*105:30 Exo 8.1-6

*105:31 Exo 8.16-17, 20-24

*105:32 Exo 9.22-25

*105:34 Exo 10.12-15

*105:36 Exo 12.29

*105:37 Exo 12.33-36

*105:39 Exo 13.21-22

*105:40 Exo 16.2-15

*105:41 Exo 17.1-7; Num 20.2-13

*105:44 Josh 11.16-23

*105:45 Duuhia Tagi Maolunga: de muna Hebrew go Hallelujah.