De Beebaa Dabu Psalm 106

106

1 Duuhia Tagi Maolunga!*

Hagaahea ange de abodonu gi Tagi Maolunga, i hiidinga ia e danuaa;

dono abodonu e dagodo ga hano ai!*

2 Goai e maua i de tala gi odi hegau sauaa a Tagi Maolunga,

gai goai e maua i de hai gi dohu danuaa dono tuhi?

3 E manuuia gilaadeu e hai hegau i de hagamodu muna heohi,

ma de hai hegau i de heohi i masavaa alodahi.

4 Tagi Maolunga, manadua mai huu au

i de masavaa aau e abodonu ange ai gi oo dangada,

gai balea mai au i dau hagaola gilaadeu;

5 gai gi gidee ai e au de manuuia o dangada aau gu hili,

gai au ga malangilangi ai madali doo huaahenua,

ma de tuhi madali oo dangada.

6 Gimaadeu gu haisala, bei hegau a omaadeu dubuna madagidagi;

gimaadeu gu hai mee dee heohi, ma de hai de baubau.

7 De masavaa o omaadeu dubuna e nnoho ai i Egypt,

gai gilaadeu tee hagamaanadu au hegau hagalele mouli;

gilaadeu ne ngalo dagodo o doo abodonu laumalie,

gai gilaadeu ne hai baasi adu gi de goe i gaogao Tai Mmea.† *

8 Aagai ia ne hagaola gilaadeu i hiidinga o dono ingoo,

gai ia ga hagaago mai ai dono sauaa mmahi.

9 Ia ne hagasee Tai Mmea, gai gu hai ga se gelegele mmasa;

ia ne dagi gilaadeu laa lo te vai, gu masa bei uda henua.*

10 Gai ia ne hagaola gilaadeu mai i olaadeu hagadaumee,

ma de hagaola gilaadeu mai i olaadeu hagadaumee mmahi.

11 Gai denga vai ne haoli olaadeu hagadaumee,

teai se gilaadeu ne ola.

12 Gai gilaadeu gu hagadonusia ana muna,

gai gilaadeu ga daahili ga tuhi ia.*

13 Aagai ne moolau delaadeu ngalo ana hegau;

gilaadeu tee tali gi iloo e gilaadeu ana hagatau.

14 Gai gilaadeu ne llodo mmao i denga gai i de vao,

gai gilaadeu ne hagatale de Maadua i lodo henua.*

15 Ia ne gaavange gi gilaadeu olaadeu mee ne dangidangi ai,

gai ne gaamai de mee hagamaakau gi olaadeu magavaa.

16 Gilaadeu ne magiaa ange gi Moses

ma Aaron, taane gu hagadabu ange gi Tagi Maolunga,*

17 gai de gelegele gu mahuge age ga holo Dathan,

ma de haoli dangada alodahi madali Abiram.

18 De ahi ne ula i magavaa olaadeu hagabuulinga,

ga dudu de gau baubau.

19 Gilaadeu ne hai dahi kaau gauligi i Horeb

ma de daumaha ange gi dahi diinonga baalanga.*

20 Gilaadeu ne hagahesuihagi de mahamaha o delaadeu Maadua

i dahi diinonga ne hagadulagi ange gi de kaau, e gai laa denga helii.

21 Gai gilaadeu ne ngalo de Maadua, delaadeu Ia Hagaola,

go de ia ne haia denga hegau maolunga i Egypt,

22 ma hegau hagalele mouli i de henua o Ham,

ma mee hagamaatagu i gaogao Tai Mmea.

23 Gai ia ne hagadaba bolo e daa gilaadeu gi maakau;

aagai Moses, dana daane ne hili,

ne dangidangi i olaadeu hiidinga i ono mada i mua,

ga hai ia gi dee daia gilaadeu gi maakau i dono bole.

24 Gai gilaadeu ne kino i de henua danuaa laa,

gai tee hagadonusia dana mee gu hagatoo donu ai.*

25 Gai gilaadeu ne nnanu i lodo olaadeu hale malo,

gai tee hagallongo ange gi muna a Tagi Maolunga.

26 Deelaa ai, ia ne haalo age dono lima ga hagatoo donu ange gi gilaadeu

bolo ia e daa donu gilaadeu gi maakau i de vao,

27 ma de hai olaadeu hagadiilinga gi nnoho saele i daho denga huaahenua,

aama de hai gi mavaevae saele gilaadeu gi denga henua gee.*

28 Gilaadeu e hagapigi ange gi Baal o Peor,

ma de gai mee e sigidaumaha ange gi denga diinonga e dee mouli laa;*

29 gai gilaadeu ne hai ga lili Tagi Maolunga i alaadeu hegau baubau,

gai de mee hagamaakau gu humai gi gilaadeu.

30 Aagai Phinehas ne hidi age ga daa gu maakau dangada gu haisala laa,

gai de mee hagamaakau laa gu tuu.

31 Gai de hegau nei ne hai ga hagabinga ia bolo se daane heohi

i de atangada e loomai i muli mai.

32 Gilaadeu ne hai ga lili Tagi Maolunga i gaogao de vai o Meribah,

gai de hai ngadaa ne duu ange gi Moses i olaadeu hiidinga,*

33 go hiidinga gilaadeu ne hai baasi ange gi de Hagasaalunga o de Maadua,

deelaa ai, Moses tee maanadu donu ana muna ne tala.

34 Gilaadeu tee daa gi maakau denga huaahenua,

bei de hai a Tagi Maolunga gu tala ange ai gi gilaadeu,*

35 aagai gilaadeu ne hulo ga hai bodu ange gi dangada i denga huaahenua laa

ma de ago ange i alaadeu dahulinga.

36 Gilaadeu ne daumaha ange gi diinonga o denga huaahenua,

gai olaadeu lodo gu noodia i de mee nei.

37 Gilaadeu ne sigidaumaha ange alaadeu dama daane

ma damaa hine gi denga hagasaalunga baubau;*

38 gilaadeu ne hai ga ssali dodo o dangada e dee haisala,

go dodo o alaadeu dama daane ma damaa hine,

go dama alaadeu ne sigidaumaha ange gi denga diinonga o Canaan;

gai de henua gu hakino gee i denga dodo.*

39 Gai gilaadeu gu hakino gee i alaadeu hegau ne hai,

gilaadeu ne hai hegau bei de hine hai be se manu.

40 Deelaa ai, Tagi Maolunga gu lili i ono dangada,

ma de kino i dangada o dono boolonga.*

41 Ia ne dugu ange denga huaahenua gi hagadee kii ina gilaadeu,

ma de hai olaadeu hagadaumee gi dagina gilaadeu.

42 Olaadeu hagadaumee ne vaivai hai gilaadeu,

ma de hai gilaadeu gi nnoho i lalo olaadeu sauaa.

43 Ne lagolago hanonga aana ne hagaola ai gilaadeu,

gai gilaadeu ne daudali donu huu i alaadeu hagatau,

gai olaadeu baubau gu hai gilaadeu ma gu maolalo.

44 Gai ia ne galo ange ga tilo delaadeu duasala,

i de masavaa aana ne langona ai delaadeu tangi.

45 Gai ia ne manadua dana hagatoo donu hagaheloongoi,

ga sui dana maanadu ga abodonu ange gi gilaadeu.

46 Gai ia ne hai dangada ne hagadee kii ina gilaadeu

gi lodo aaloha ange gi gilaadeu.

47 Tagi Maolunga, demaadeu Maadua, hagaola ina gimaadeu;

hagaahea mai gimaadeu i daho denga huaahenua,

gai gimaadeu ga hagadegi ai doo ingoo dabu

ma de hagamahamaha goe i de tuhi.*

48 Hagadegi ina Tagi Maolunga, de Maadua o Israel,

mai i de masavaa e dee ngado mai

ga dae ai gi de masavaa e dee ngado mai.

Gai dangada alodahi gi hai ange, “Amen!”

Duuhia Tagi Maolunga!

*106:1 Duuhia Tagi Maolunga: de muna Hebrew go Hallelujah, diiloo hogi de gubu e 48.

*106:1 1 Ch 16.34; 2 Ch 5.13; 7.3; Ezra 3.11; Psa 100.5; 107.1; 118.1; 136.1; Jer 33.11

†106:7 Tai Mmea: de Beebaa Hebrew e hai ange go Tai o denga Aalege.

*106:7 Exo 14.10-12

*106:9 Exo 14.21-31

*106:12 Exo 15.1-21

*106:14 Num 11.4-34

*106:16 Num 16.1-35

*106:19 Exo 32.1-14

*106:24 Num 14.1-35

*106:27 Lev 26.33

*106:28 Num 25.1-13

*106:32 Num 20.2-13

*106:34 Jdg 2.1-3; 3.5-6

*106:37 2 Ki 17.17

*106:38 Num 35.33

*106:40 Jdg 2.14-18

*106:47 1 Ch 16.35-36