De lima beebaa
107
(Psalm 107—150)
1 Hagaahe ange de abodonu gi Tagi Maolunga, go hiidinga ia e danuaa;
dono abodonu e dee helui donu ga hano ai.*1 Ch 16.34; 2 Ch 5.13; 7.3; Ezra 3.11; Psa 100.5; 106.1; 118.1; 136.1; Jer 33.11
2 Gilaadeu a Tagi Maolunga gu hagaola gi daalaa mee nei —
go gilaadeu aana gu hagaola mai i olaadeu hagadaumee,
3 ma gilaadeu aana gu hagaahe mai i denga henua gee,
i dua ma dai, aama ngaiho ma ngaage.
4 Hanu gilaadeu ne silivaahea saele i lodo henua,
tee maua e gilaadeu gi gidee dahi aduhale e nnoho ai.
5 Gilaadeu ne hiikai ma de hieunu,
gai gu baageaa olaadeu lodo.
6 Gai gilaadeu ne tangi ange gi Tagi Maolunga i delaadeu hai ngadaa,
gai ia ga hagaola gilaadeu mai i olaadeu duasala.
7 Ia ne dagi gilaadeu i de haiava soe
ga kave gilaadeu gi nnoho i dahi aduhale.
8 Gilaadeu gi hagadegi ina Tagi Maolunga i hiidinga dono abodonu,
ma ana hegau hagalele mouli ange gi dangada.
9 Ia e hagaunu gi boobosu gilaadeu e hieunu,
gai e haangai gi boobosu gilaadeu e hiikai i mee danuaa.
10 Hanu ne nnoho i lo te goohunga ma de gohu boo dangodango,
gilaadeu i lo te hale pono e duasala i denga daula baalanga,
11 go hiidinga gilaadeu ne hai baasi ange gi muna a de Maadua,
ma de hagangadi mee agoago a de Ia Maolunga Mmao laa.
12 Deelaa ai, ia ne hagaduasala gilaadeu i hegau daemaha;
gilaadeu ne baakuu, gai teai ne balea ange gilaadeu.
13 Gilaadeu ne tangi ange gi Tagi Maolunga i delaadeu hai ngadaa,
gai ia ga hagaola gilaadeu mai i olaadeu duasala.
14 Ia ne hagassao mai gilaadeu i lo te goohunga ma de gohu boo dangodango,
ma de duuduu olaadeu mee e noonooa ai laa.
15 Gilaadeu gi hagadegi ina Tagi Maolunga i hiidinga dono abodonu,
ma ana hegau hagalele mouli ange gi dangada.
16 Gai ia e oha denga haitoga bronze,
ma de duuduu lua denga mee hagamakaga e hai i iron.
17 Hanu gilaadeu ne llodo ssenga i hiidinga olaadeu haisala,
gai ne hagaduasala i hiidinga olaadeu baubau.
18 Gilaadeu ne kino i de gaimee,
gai gilaadeu ne dai maakau donu.
19 Gai gilaadeu ne tangi ange gi Tagi Maolunga i delaadeu hai ngadaa,
gai ia ga hagaola gilaadeu mai i olaadeu duasala.
20 Ia ne tala donu huu de muna, gai gilaadeu gu ieiangi,
gai ne hagaola gilaadeu mai i de magau.
21 Gilaadeu gi hagadegi ina Tagi Maolunga i hiidinga dono abodonu,
ma ana hegau hagalele mouli ange gi dangada.
22 Gilaadeu gi haia denga sigidaumaha o de hagadegi,
ma de tala ana mee gu hai i denga daahili hagamalangilangi!
23 Hanu gilaadeu ne loiho gi denga vaga i honga tai;
gilaadeu ni dangada hagao mee i honga tai laumalie.
24 Gilaadeu gu gidee denga hegau a Tagi Maolunga,
go ana hegau hagalele mouli ne hai i honga tai.
25 Ia ne basa donu huu, gai gu ssau de madangi mmahi,
ga hagabeabeau honga tai.
26 Gilaadeu ne loage gi de langi, ma de loiho gi lodo mommee kelo;
gai gu baageaa olaadeu lodo i hiidinga o olaadeu hai ngadaa.
27 Gilaadeu gu ssee saele bei dagodo o tangada senga,
gilaadeu gu dee iloo be ni aha alaadeu e hai.
28 Gai gilaadeu ga tangi ange gi Tagi Maolunga i delaadeu hai ngadaa,
gai ia ga hagaola gilaadeu mai i olaadeu duasala.
29 Ia ne hai gi sili de madangi,
gai gu malino honga tai.
30 Gai gilaadeu gu malangilangi i de malino,
gai ia ne dagi gilaadeu gi taulanga olaadeu e llodo ai.
31 Gilaadeu gi hagadegi ina Tagi Maolunga i hiidinga dono abodonu,
ma ana hegau hagalele mouli ange gi dangada!
32 Gilaadeu gi hagaamua ina ia i daho de hagabuulingaa dangada,
ma de tuhi ia madali de hagabuulinga o denga dagi.
33 Ia e hai denga saalingaa vai gi bei de vao,
gai denga saalingaa vai gi se gelegele mmasa,
34 de gelegele iai manu hhua lagolago gi se gelegele e dee ssomo ai manu,
i hiidinga baubau o dangada e nnoho i kilaa.
35 Ia e hai de vao gi se mommee iai denga vai,
gai de gelegele mmasa gi se mommee iai denga saalingaa vai.
36 Gai ia ne gaamai gilaadeu e hiikai gi nnoho i kilaa,
gai gilaadeu ne hagaduu dahi aduhale ga nnoho ai.
37 Gilaadeu ne doo denga veelenga, ma denga veelengaa grape
gai ne lagolago hua ne maua ai.
38 Ia ne hagamanuuia gilaadeu, gai gilaadeu ne hagadili ga kona de soa;
gai ia tee hai gi sogoisi mai alaadeu manu haangai.
39 Gai gilaadeu ne sogoisi mai, ma de hagangadi mee ina
i delaadeu vaivai haia, ma de duasala, aama de daemaha;
40 ia ne kino i de gau aamua,
ma de hai gilaadeu gi silivaahea saele i de vao e deai se haiava iai.
41 Aagai ia e hagaola de gau hagaau aloha mai i olaadeu duasala,
ma de hai olaadeu huaabodu gi soa bei dagodo o denga hagabuulingaa ssiibi.
42 De gau heohi e malangilangi naa i delaadeu gide mee nei;
gai de gau baubau gu dee mmuu naa.
43 Tangada heiangi gi daohia mee nei;
gai ia gi manadua de abodonu o Tagi Maolunga.