1 De Maadua, ogu lodo e dee sui donu.

Au e daahili ma de tuhi goe!

2 De harp ma de lyre, gooluu aalahage;

au e alahage naa hogi i taiao gohugohu!

3 Tagi Maolunga, au e hagaahe adu de abodonu i magavaa o denga huaadangada;

au e daahili ga tuhi goe i magavaa o denga huaahenua.

4 Go hiidinga doo abodonu e maolunga ange i de langi;

doo hai hegau i de mee abodonu e dae gi lo te langi i lunga.

5 De Maadua, doo hagaamua e maolunga ange i de langi,

gai doo mahamaha gi dae gi henua i lalo alodahi.

6 Hagaola ina mai gimaadeu i doo lima madau,

ma de basa mai gi agu dalodalo,

gi ola ai gilaadeu oou e aloha ai.

7 De Maadua gu basa mai i dono mommee dabu:

“Au e vaevae naa Shechem i de malangilangi,

ma de haide de geelonga o Succoth.

8 Niiogu Gilead, niiogu Manasseh;

Ephraim go dogu goobai baalanga;

Judah go dagu laagau hodooligi.

9 Moab go dogu beisini gaugau;

au e maga ange dogu mee vae gi honga o Edom;

gai au e oo e tala dogu kii i Philistia.”

10 Goai e gaavee au gi de aduhale buibui laa?

Goai e dagina ngau gi Edom?

11 De Maadua, e dee go koe ne dilia laa gimaadeu,

gai gu dee hano madali omaadeu hagabuulinga hebagi?

12 Balea mai gimaadeu e hebagi ange ai gi de hagadaumee,

go hiidinga de bale mai i daho dangada e deai ono haigamaiana.

13 Go de Maadua e hagammahi gimaadeu,

gai go ia e hagadee kii ina omaadeu hagadaumee.