1 De Maadua, de ia aagu e tuhi,

aude noho gi dee muu.

2 De gau baubau ma de hadu muna gu hagabaubau au;

gilaadeu gu hai baasi mai gi de au i alaadeu muna hhadu.

3 Gilaadeu e duuli au i alaadeu muna hagabaubau,

gilaadeu e hebagi mai gi de au, i teai hiidinga.

4 Gilaadeu e sui mai dogu aloha i de hagabaubau au;

aagai au e hagaduu ngae i talodalo.

5 Gilaadeu e sui mai dagu danuaa ne hai i de baubau,

ma de sui mai dogu aloha i de kino.

6 Hilia ange dahi dangada baubau gi hai baasi ange gi de ia,

gai dahi ono hagadaumee gi hagabaubau ina ia.

7 De masavaa e hagamodu ai ono muna, gai hagabuu ina ange saalaa gi de ia;

gai ana dalodalo gi hagabinga bolo se haisala.

8 Gi sogoisi ono laangi e mouli ai;

gai dono duulanga gi gaavange gi dahi dangada gee.*Acts 1.20

9 Ana dama gi deai olaadeu damana,

gai dono bodu gi se hine hagaaloha.

10 Ana dama gi silivaahea saele, gi dangidangi i alaadeu gai;

gai gilaadeu gi dee nnoho i olaadeu mommee gu maoha laa.

11 Tangada oona e muli ange aagena gi gaavee ono goloa alodahi;

gai dangada gi gaavee mee alodahi oona ne hai hegau ange aagena.

12 Gai gi deai e abodonu ange gi de ia,

aabe gi aloha ange gi ana dama i dua dono magau!

13 Dono aamuli gi odi i de maakau;

gai sooloa gi deai olaadeu ingoo mai i de atangada i olaadeu dua.

14 Tagi Maolunga gi dee ngalo donu baubau o ono maadua,

gai gi dee sooloa donu haisala o dono dinana.

15 Olaadeu haisala gi daakodo donu huu

i mada i mua o Tagi Maolunga i masavaa alodahi,

gai ia ga hai ai gi deai dangada e manadua gilaadeu i de henua.

16 Go hiidinga ia tee maanadu de hai hegau i de abodonu,

gai ne vaivai hai de gau hagaau aloha ma de duasala,

aama gilaadeu e daemaha mmao laa.

17 Ia e lodo mmao e basa hagamalaia dangada —

deelaa ai, de malaia gi ahe ange donu huu gi de ia;

ia tee malangilangi i de hagamanuuia dangada —

deelaa ai, de manuuia gi mmao gee i de ia.

18 De hagamalaia e saabini ia, bei de malo oona e gahu ai laa,

gai gu ulu gi ono lodo bei denga vai,

gai gu bei denga lolo i lodo ono ivi.

19 De hagamalaia gi bei de malo e saabini ai laa ia,

ma de beele e nnoa ai laa dono ungaalodo ga hano ai.

20 Gai gi deenei de hagaoanga a Tagi Maolunga

e gaavange gi gilaadeu e hagabaubau ina ogu dagodo,

ma gilaadeu e pasa baubau i de au.

21 Aagai koe, Tagi Maolunga, dogu Ia Aamua,

abodonu mai gi de au, i hiidinga o doo ingoo;

gai hagaola ina mai au i hiidinga doo abodonu.

22 Au gu duasala ma de hagaaloha ogu dagodo,

gai ogu lodo gu daemaha mmao.

23 Au gu bei de goohunga i de ahiahi gu dai lilo laa,

gai au gu bei de itebuubuu e luuluu ina laa ga doo.

24 Luoogu vae gu pole i dogu hagahiigai,

gai au gu bangabanga ma de saava.

25 Au gu se mee e kada ai dangada;

gilaadeu e geugeu olaadeu biho i delaadeu gide au.*Mat 27.39; Mark 15.29

26 Tagi Maolunga, dogu Maadua, balea mai au;

hagaola ina mai au bei dagodo o doo abodonu.

27 Haia gi iloo e gilaadeu bolo go koe donu ne haia de hegau nei,

Tagi Maolunga, go koe donu ne haia de mee nei.

28 Gilaadeu gi hagamalaia ina au, aagai koe ga hagamanuuia ai au;

gilaadeu e hebagi mai gi de au gi dee kii;

aagai au, doo dangada hai hegau gi malangilangi.

29 Gai gi deai se hagadubu o dangada e hagabaubau ina au,

gai gilaadeu gi hagauda ina togaa bei de malo laa daha.

30 Au e tuhi donu Tagi Maolunga;

au e tuhi ia i magavaa o dangada soa.

31 Ia e duu i de madau e bale ange ai tangada hagaaloha,

e hagamouli ia mai i gilaadeu gu gaavange ia e daa gi magau.