111
Au e hagaahe ange de abodonu gi Tagi Maolunga i ogu lodo alodahi,
i magavaa o de hagabuulinga o olaadeu e heohi.
2 Hegau a Tagi Maolunga e maolunga mmao,
gai dangada e malangilangi ai e hagamaumau mee nei.
3 Ana hegau e honu i de mahamaha ma de hagadubu,
gai dono heohi e dagodo ga hano ai.
4 Ia gu hai gi dee ngalo ana hegau hagalele mouli;
Tagi Maolunga e degi ma de lodo aloha.
5 Ia e gaavange gai a dangada e maatagu i de ia;
ia e dee ngalo donu dana hagatoo donu hagaheloongoi.
6 Ia gu hagaago ange gi ono dangada ana hegau sauaa,
i dana gaavange gi gilaadeu henua o denga huaahenua.
7 Ia e hai hegau i de muna abodonu ma de heohi;
ana muna alodahi ni muna abodonu,
8 gai ne hai gi daakodo ga hano ai e dee ngado mai,
gai ne hai hegau i de mee abodonu aama de heohi.
9 Ia ne hagaola ono dangada;
ia ne hai dana hagatoo donu hagaheloongoi gi dagodo ga hano ai,
dono ingoo e dabu gai e hagamaatagu.
10 De madagu i Tagi Maolunga go taamada o de heiangi;
dangada alodahi e seesee i ana hainga e tonu danuaa ange.
Dono tuhi gi dee helui ga hano ai!*Job 28.28; Pro 1.7; 9.10