114
De masavaa o Israel ne sao ai ga hano gee mai i Egypt,
gai dangada o Jacob ne hulo gee mai i daho dangada e pasa i muna henua gee,*Exo 12.51
gai Judah ne hai go de mommee dabu o de Maadua,
gai Israel go dono mommee e hodooligi ai.
 
Tai ne gidee, gai gu savini ga hano,
ssaalingaa vai go Jordan ne ahe dua.*Exo 14.21; Josh 3.16
Denga mounga ne llele saele bei denga ssiibi daane;
denga duuduu ne llele saele bei denga ssiibi gauligi.
 
Tai, gu aha gu savini ai laa goe ma gu hano?
Jordan, gu aha gu ahe dua ai laa goe?
Denga mounga, gu aha gu llele saele ai naa goodou bei denga ssiibi daane?
Denga duuduu, gu aha gu llele saele ai naa goodou bei denga ssiibi gauligi?
 
Henua i lalo, bolebole i mada luu mada o de Ia Aamua,
ma mada luu mada o de Maadua o Jacob,
go de ia ne haia de baba ga se mommee e hhao ai vai,
gai ne hai de baba ga se saalingaa vai.*Exo 17.1-7; Num 20.2-13

*114:1 Exo 12.51

*114:3 Exo 14.21; Josh 3.16

*114:8 Exo 17.1-7; Num 20.2-13