115
1 Tagi Maolunga, e dee niiomaadeu, e dee niiomaadeu,
aagai niiou de mahamaha,
i hiidinga doo abodonu, ma doo hai hegau i de muna abodonu.
2 Gu aha gu hagataba ai denga huaahenua,
“I hee iai delaadeu Maadua?”
3 Demaadeu Maadua e noho i de langi;
ia e hai be se aha aana e lodo e hai.
4 Aagai olaadeu diinonga ni mee e hai i selevaa ma goolo,
gai ne hai i lima o dangada.*Psa 135.15-18; Rev 9.20
5 E hanu olaadeu ngudu, aagai e dee maua i de pasa;
e hanu olaadeu ganomada, aagai e dee maua gi gidee;
6 e hanu olaadeu dalinga, aagai e dee maua i de hagallongo;
e hanu olaadeu usu, aagai e dee maua i de hagadungu;
7 e hanu olaadeu lima, aagai e dee maua i de poo ange dahi mee;
e hanu olaadeu vae, aagai e dee maua i de seesee;
aagai e dee maua hogi i de hai dahi damaa leo daudahi.
8 Dangada e haia denga diinonga e bei donu olaadeu dagodo,
gai e bei ai hogi gilaadeu e hagadonusia mee nei.
9 De gau Israel, goodou kai ange gi Tagi Maolunga!
Ia go delaadeu bale ma delaadeu mee hungihungi.
10 De aamuli o Aaron, goodou kai ange gi Tagi Maolunga!
Ia go delaadeu bale ma delaadeu mee hungihungi.
11 Dangada e maatagu i Tagi Maolunga, goodou kai ange gi Tagi Maolunga!
Ia go delaadeu bale ma delaadeu mee hungihungi.
12 Tagi Maolunga e dee ngalo donu gidaadeu;
ia e hagamanuuia naa gidaadeu.
Ia e hagamanuuia naa de aamuli o Israel;
ia e hagamanuuia naa de aamuli o Aaron.
13 Ia e hagamanuuia naa gilaadeu e maatagu i de ia,
go de gau maolalo ma de gau maolunga.*Rev 11.18; 19.5
14 Tagi Maolunga gi haia gi hagadagadaga age goodou,
go goodou alodahi ma oodou dama.
15 Tagi Maolunga gi hagamanuuia ina goodou,
go de ia ne haia de langi ma henua i lalo.
16 De langi niio Tagi Maolunga,
aagai henua i lalo gu lava i dana gaavange gi dangada.
17 De gau maakau e dee maua i de tuhi Tagi Maolunga,
aabe go dangada gu loiho gi de mommee e dee mmuu ai dangada.*Psa 104.35
18 Gai gimaadeu e hagadegi Tagi Maolunga,
mai iainei ga hano ai e dee ngado mai.
Duuhia Tagi Maolunga!*Duuhia Tagi Maolunga: de muna Hebrew go Hallelujah.