116
1 Au e aloha i Tagi Maolunga, i hiidinga ia ne hagallongo dogu leo,
ma dogu dangidangi i de abodonu.
2 Ia ne huli mai dono dalinga gi de au,
deenei ai, au e hagahi ange ia i taulooloa dogu mouli.
3 Denga daula o de magau gu vini au;
de hagaduasala o de magau gu haoli au;
gai au gu dee baba ma de manavasaa.
4 Gai au ne hagahi ange de ingoo o Tagi Maolunga, ga hai ange,
“Tagi Maolunga, au e dangidangi adu, hagaola ina mai au!”
5 Tagi Maolunga e degi ma de heohi,
taadeu Maadua e honu i de lodo aloha.
6 Tagi Maolunga e buibui gilaadeu e hagaaloha;
de masavaa oogu ne duasala ai, gai ia ne hagamouli au.
7 Dogu hagasaalunga, koe gi ahe ange gi noho baba,
go hiidinga Tagi Maolunga gu abodonu adu gi de goe.
8 Koe gu hagaola dogu mouli mai i de magau,
ma de ssolo loimada i luoogu mada,
aama de daohi luoogu vae gi dee baguu ai au.
9 Tagi Maolunga, au e seesee i mada luoo mada
i de masavaa oogu e mouli ai.
10 Au ne hagadonusia, gai ga hagadaba naa donu au,
“Au gu duasala mmao.” *2 Co 4.13
11 Gai au ne hagadaba i dogu madagu,
“Dangada alodahi ni dangada hadu muna.”
12 Se aha aagu e hagao ange ai Tagi Maolunga
i de laumalie dono abodonu mai gi de au?
13 Au e daohi age de ubu o de hagaola,
ma de dalodalo ange gi de ingoo o Tagi Maolunga.
14 Au e hagasula naa agu hagatoo donu ange gi Tagi Maolunga,
i madamada o ono dangada alodahi.
15 Se mee hagamogomogo i daho Tagi Maolunga
de maakau o ono dangada dabu.
16 Tagi Maolunga, go au donu doo dangada hai hegau;
go au doo dangada hai hegau,
go tama daane a doo hahine hai hegau;
koe gu tala ogu mee e nnoa ai.
17 Tagi Maolunga, au e hai ssigidaumaha o de hagadegi,
aama de hagahi adu goe.
18 Au e hagasula naa agu hagatoo donu ange gi Tagi Maolunga,
i madamada o ono dangada alodahi,
19 i lo te buibui o de hale o Tagi Maolunga,
i de aduhale go Jerusalem.
Duuhia Tagi Maolunga!*Duuhia Tagi Maolunga: de muna Hebrew go Hallelujah.