118
1 Hagaahea ange de abodonu gi Tagi Maolunga, go hiidinga ia e danuaa;
dono abodonu e dagodo ga hano ai.*1 Ch 16.34; 2 Ch 5.13; 7.3; Ezra 3.11; Psa 100.5; 106.1; 107.1; 136.1; Jer 33.11
2 De gau Israel gi hagataba,
“Dono abodonu e dagodo ga hano ai.”
3 De aamuli o Aaron gi hagataba,
“Dono abodonu e dagodo ga hano ai.”
4 Alodahi e maatagu i Tagi Maolunga gi hagataba,
“Dono abodonu e dagodo ga hano ai.”
5 Au ne hagahi Tagi Maolunga i dogu duasala,
gai ia ne basa mai gi dagu dalodalo, ga hai gi ilaage au.
6 Tagi Maolunga e hagabuni mai donu gi de au;
au e dee madagu donu.
Ni aha naa donu a dahi dangada e maua i de hai mai gi de au?*Heb 13.6
7 Tagi Maolunga e hagabuni mai gi de au ma de bale mai au;
au e gidee naa de hagadee kii ina o dangada e kino i de au.
8 E danuaa ange taadeu buibui i daho Tagi Maolunga
i taadeu hagadonu dahi dangada.
9 E danuaa ange taadeu buibui i daho Tagi Maolunga
i taadeu hagadonu dagi o de henua.
10 Denga huaahenua alodahi gu duuli au;
gai au ne hagadee kii gilaadeu i de ingoo o Tagi Maolunga.
11 Gilaadeu gu duuli au, gilaadeu gu duuli donu au;
gai au ne hagadee kii gilaadeu i de ingoo o Tagi Maolunga.
12 Gilaadeu ne duuli au bei denga lango hai hooni;
gilaadeu e moolau de made bei de ahi i lodo manu daladala;
au ne hagadee kii gilaadeu i de ingoo o Tagi Maolunga.
13 Au ne usuhia donu ga dai baguu,
gai Tagi Maolunga ne bale mai au.
14 Go Tagi Maolunga ogu mahi ma dagu daahili,
gai go ia dogu Ia Hagaola.*Exo 15.2; Isa 12.2
15 Hagalaangona adu de hevaalogi o olaadeu e heohi i de malangilangi ma de kii
i lodo olaadeu hale malo:
“De lima madau o Tagi Maolunga gu hagaago mai ono mmahi!
16 De lima madau o Tagi Maolunga gu kii;
de lima madau o Tagi Maolunga gu hagaago mai ono mmahi!”
17 Au e dee magau donu aagai e mouli,
ga tala dagodo hegau hagalele mouli a Tagi Maolunga.
18 Tagi Maolunga ne kona mmao dana hagaduasala au,
aagai tee daa donu au gi magau.
19 Huugea mai gi de au denga haitoga o de heohi,
gai au ga ulu ai e hagadegi Tagi Maolunga.
20 Deenei de haitoga o Tagi Maolunga;
gai go gilaadeu e heohi e ulu ai.
21 Au e hagadegi goe, i hiidinga koe ne basa mai gi dagu dalodalo;
go koe dogu Ia Hagaola.
22 De hadu a de gau hagatuu hale ne hagangadi mee
gu hai go de hadu i tege.*Luke 20.17; Acts 4.11; 1 Pe 2.7 *Mat 21.42; Mark 12.10-11
23 De mee nei go Tagi Maolunga ne haia,
gai e hagalele mouli i taadeu tilo.
24 Deenei de laangi a Tagi Maolunga ne hai;
gidaadeu gi malangilangi ma de llodo danuaa ai.
25 Tagi Maolunga, gimaadeu e dangidangi adu,
hagaola ina gimaadeu!
Tagi Maolunga, gimaadeu e dangidangi adu,
haia gi hagadagadaga age gimaadeu!*Mat 21.9; 23.39; Mark 11.9; Luke 13.35; 19.38; John 12.13
26 E manuuia tangada e humai i de ingoo o Tagi Maolunga.
Gimaadeu e hagamanuuia goodou mai i de hale o Tagi Maolunga.
27 Iahweh go de Maadua,
gai ia ne hai dono maalama gi hagamaalama ina gimaadeu.
Noodia ange de manu o ssigidaumaha i daula
gi denga hanga o de mommee o ssigidaumaha.
28 Go koe donu dogu Maadua, au e hagaahe adu de abodonu gi de goe;
go koe dogu Maadua, au e hagaamua goe.
29 Hagaahea ange de abodonu gi Tagi Maolunga, go hiidinga ia e danuaa;
dono abodonu e dagodo ga hano ai.