119
Aleph
1 E manuuia gilaadeu e dee haisala,
i delaadeu daudali i hainga a Tagi Maolunga.
2 E manuuia gilaadeu e daohia ana muna,
ma de ssala ia i olaadeu lodo alodahi,
3 gai e dee hai hegau i mee dee heohi,
aagai gilaadeu e seesee i ono lodo.
4 Koe gu lava i de hagaduu au muna gu hagasauaa
gai dangada gi kana ange gi daohia.
5 Mee naa gi maua e au i de daohi gi makaga
ga daudali i au muna gu hagasauaa!
6 Gai gi dee hagadogaa ina ai au,
i dagu daumada au hainga alodahi.
7 Au e tuhi goe i de lodo se muna abodonu,
i de masavaa aagu ne iloo ai dau hagamodu.
8 Au e daohi au hainga gu hagasauaa;
aude dilia loo au!
Beth
9 Dee hee de hai a dahi dama daane e hai ai gi gilimalali dono mouli?
Go dana dagitilo ga daudali i au muna.
10 Au e ssala goe i ogu lodo alodahi;
koe gi dee dugua ngau gi hano gee i au hainga!
11 Au e doange au muna i ogu lodo,
gi dee haisala adu ai au gi de goe.
12 Tagi Maolunga, au e hagadegi goe;
agoago ina mai au i au hainga gu hagasauaa!
13 Au e tala hagamodu alodahi
aau gu tala mai.
14 Au e kii ange dogu malangilangi i de daudali i au muna
i dogu malangilangi i goloa lagolago.
15 Au e hagamaumau au muna gu hagasauaa,
ma de hagasaele dagodo o oo haiava.
16 Au e malangilangi i au hainga gu hagasauaa;
au e dee ngalo naa donu au muna.
Gimel
17 Koe gi abodonu mai gi de au, doo dangada hai hegau, gi mouli ai au,
au e daohi naa donu au muna.
18 Koe gi huugea luoogu ganomada,
gi donu ange ai au gi mee hagalele mouli i lodo au hainga.
19 Au se dangada e noho gaainga i henua i lalo;
koe gi dee hagamuunia au muna i de au!
20 Au e kona mmao de maanadu
au hagamodu i masavaa alodahi.
21 Koe e hagasee de gau hagamaolunga, go gilaadeu gu maalaia,
gilaadeu ni dangada gu hulo gee i au hainga.
22 Aude dugua ange gilaadeu gi hagadogaa ina ngau,
go hiidinga au e daohi au muna.
23 Gai ga hagabuni naa donu denga dagi
e hagatau de hai baasi mai ai gi de au,
gai au, doo dangada hai hegau, e hagamaumau au hainga gu hagasauaa.
24 Au e malangilangi i au muna,
gai go au muna dogu ia bale.
Daleth
25 Au gu dagodo gi lalo i lo te gelegele;
hagaola ina dogu mouli bei dagodo au muna!
26 Au ne tala adu ogu dagodo, gai koe ne basa mai gi agu dalodalo;
agoagona mai au i au hainga gu hagasauaa.
27 Haia gi donu ange au gi au muna gu hagasauaa,
gai au ga hagamaumau ai dagodo o au hegau hagalele mouli.
28 Au gu deai ogu mahi i de daemaha ogu lodo;
koe gi hagamaamaane ina ogu lodo, bei dagodo o au muna.
29 Gaavee gee de hadu muna mai i ogu daha,
gai agoagona mai au i au hainga i hiidinga doo abodonu.
30 Au gu hilihili de hai hegau i de muna abodonu,
au gu dugu au hagamodu i ogu mada i mua.
31 Tagi Maolunga, au e daohi au hainga;
koe gi dee dugua ange au gi de hagadogaa.
32 Au e savini i lo te haiava o au hainga,
go hiidinga koe gu hai gi donu danuaa ange au.
He
33 Tagi Maolunga, agoagona mai au i au hainga gu hagasauaa,
gai au ga daohi ga dae ai gi de hagaodi.
34 Haia gi donu ange au, gai au ga daohi dau hainga
ma de daudali i mee nei i ogu lodo alodahi.
35 Dagina huu au i de haiava o au hainga,
go hiidinga au e malangilangi ai.
36 Hagahulia ange ogu lodo gi au muna,
e dee go de nnoo hagamau mee.
37 Hagahulia gee luoogu mada i mee e deai olaadeu haigamaiana;
gai hagaola ina dogu mouli gi bei dagodo o au muna.
38 Hagasula ina dau hagatoo donu ange gi doo dangada hai hegau,
gi maatagu ai dangada i de goe.
39 Gaavee gee togaa oogu e madagu ai laa;
go hiidinga au hagamodu e danuaa.
40 Tilo, au e lodo mmao i au muna gu hagasauaa.
Koe gi daohia dogu mouli i hiidinga koe e heohi.
Vav
41 Tagi Maolunga, abodonu mai gi de au,
gai hagaola ina ngau bei dagodo o au muna,
42 gi maua ai e au i de basa ange gi gilaadeu e hagadogaa ina ngau,
i hiidinga au e hagadonusia au muna.
43 Koe gi dee aaua gee au muna heohi mai i lo togu ngudu,
go hiidinga dagu tali hagalodolodo go au hagamodu.
44 Au e duudagi de daohi au hainga,
ga hano ai e dee ngado mai;
45 gai au e maua naa i de seesee i de ilaage,
go hiidinga au e hagaduu ngae ma e daudali i au muna gu hagasauaa.
46 Au e tala hogi au muna i madamada o denga hodooligi,
gai au e dee dogaa naa donu;
47 gai au e malangilangi i au hainga,
i hiidinga au e lodo ai mmao.
48 Au e hagadubu au hainga ma de lodo ai,
gai au e maanadu au hainga gu hagasauaa.
Zayin
49 Manadua au muna ange gi doo dangada hai hegau,
go muna ne hai ai gi dahi agu tali hagalodolodo.
50 Deenei de mee e hagaaneane ina ogu lodo i dogu duasala:
au muna e daohi dogu mouli.
51 De gau hagamaolunga e hakadanga i de au,
aagai au e dee hano gee donu i au hainga.
52 Tagi Maolunga, au e manadua au hagamodu madagidagi,
gai mee nei e hagaaneane ogu lodo.
53 Au gu lili mmao i hiidinga de gau baubau,
gu tili gee au hainga.
54 Au hainga gu hagasauaa go agu daahili
i dogu noho gaainga i henua i lalo nei.
55 Tagi Maolunga, au e maanadu doo ingoo i de boo,
ma de daohi au hainga.
56 Deenei dagu mee ne hai:
au ne daohi au muna gu hagasauaa.
Cheth
57 Go Tagi Maolunga dogu duuhanga;
au gu hagatoo donu bolo au e daohi au muna.
58 Au e dangidangi adu i doo abodonu i ogu lodo alodahi;
abodonu mai gi de au bei dagodo o au muna.
59 Au ne maanadu dagodo o agu hegau,
gai au ga huli mai ga daudali i au muna.
60 Au e hagamoolau, au e dee hagalongolongo ngadaa donu
de daudali i au muna.
61 Gai ga noodia naa donu au i uga a de gau baubau,
gai au e dee ngalo donu dau hainga.
62 Au e hidi age i lo te boo e hagadegi goe,
i hiidinga au hagamodu e heohi.
63 Au se soa niiolaadeu alodahi e maatagu i de goe,
ma gilaadeu e daohia au muna gu hagasauaa.
64 Tagi Maolunga, henua i lalo gu honu i doo abodonu;
agoagona mai au i au hainga gu hagasauaa!
Teth
65 Tagi Maolunga, haia mai tanuaa gi doo dangada hai hegau,
gi bei ai dagodo o au muna.
66 Agoagona mai au i de iloo mee ma de heiangi,
i hiidinga au e hagadonusia au hainga.
67 I mua dogu hagaduasala gai au ne haisala;
iainei gai au gu daohi au muna.
68 Koe e danuaa ma de hai hegau i tanuaa;
agoagona mai au i au hainga gu hagasauaa.
69 De gau lodo maolunga e hagabaubau au i denga muna hhadu,
aagai au e daohi au muna gu hagasauaa.
70 Olaadeu lodo gu makaga bei denga kiliisi,
aagai au e malangilangi i au hainga.
71 Gai ne haigamaiana donu dogu hagaduasala,
gai au ga agoago ai i au hainga gu hagasauaa.
72 De hainga aau e tala e hagamogomogo ange
i de mano dibadibaa goolo ma selevaa i ogu daha.
Yodh
73 Luoo lima ne hai au ma de hagadau dogu angaanga;
haia gi dahi ogu donu ange gai au ga agoago ai au hainga.
74 Gilaadeu e maatagu i de goe e malangilangi naa i delaadeu gidee au,
i hiidinga dagu tali hagalodolodo go au muna.
75 Tagi Maolunga, au e iloo bolo au hagamodu e heohi,
gai koe ne hagaduasala ngau i hiidinga doo hai hegau i de abodonu.
76 Hagaaneane ina ogu lodo i doo abodonu,
gi bei dagodo o dau hagatoo donu ange gi doo dangada hai hegau.
77 Lodo aloha mai gi de au, gi mouli ai au,
go hiidinga au e malangilangi i dau hainga.
78 Haia gi dookaa de gau hagamaolunga,
i hiidinga gilaadeu gu hai mai de baubau gi de au i teai hiidinga;
aagai au e hagamaumau au muna gu hagasauaa.
79 Haia gilaadeu e maatagu i de goe gi loomai gi de au,
go gilaadeu e tonu ange gi au mee gu tala hagadonu.
80 Au gi dee haisala ange gi au muna gu hagasauaa,
gi dee dogaa ai au.
Kaph
81 Au e lodo mmao i dau hagaola,
aagai dagu tali hagalodolodo go au muna.
82 Gu daulooloa mmao dagu tali de hagasula o dau hagatoo donu;
gai au e ssili, “Go aahee maa aau e hagaaneane ai ogu lodo?”
83 Au gu bei dagodo o gili manu hhao uvaini i lo te useahi,*gili manu hhao uvaini i lo te useahi: mee nei ni gili manu e hhao ai uvaini, gai gu daulooloa de daudau i honga de ahi, gai e tili i hiidinga gu baubau.
aagai au e dee ngalo donu au hainga gu hagasauaa.
84 Dee hee maa taulooloa de golomagi lodo o doo dangada hai hegau?
Go aahee maa aau e hagaduasala ai gilaadeu e vaivai haia nei au?
85 De gau hagamaolunga gu geli dahi geelinga moogu,
gilaadeu e dee daudali i dau hainga.
86 Au hainga alodahi ni muna abodonu;
balea mai au, i hiidinga gilaadeu e vaivai hai au gai e deai donu hiidinga.
87 E momo ange donu huu gilaadeu gu aau gee au mai i henua i lalo,
aagai au e dee tili donu au muna gu hagasauaa.
88 Hagaola ina dogu mouli i doo abodonu,
gai au e daohi au muna gu tala.
Lamedh
89 Tagi Maolunga, au muna e dee ngado mai donu,
gai e dee sui naa donu i de langi.
90 Doo hai hegau i de muna abodonu e dohu ange gi denga atangada alodahi;
koe ne hagaduu henua i lalo, gai gu duu ga makaga.
91 Gai mee nei e tuu donu anailaa nei bei dau hai gu hagamodu ai;
go hiidinga mee alodahi e hai hegau adu gi de goe.
92 Noo au tee malangilangi i au hainga,
gai au ne magau donu i lodo ogu hagaduasala.
93 Au e dee haihai naa donu ga ngalo au muna gu hagasauaa,
i hiidinga go au hainga ne hagaola ina dogu mouli.
94 Hagaola ina mai au, go hiidinga au niiau;
au ne ssala gi iloo e au, au muna gu hagasauaa.
95 De gau baubau gu nnoho e kave dogu mouli;
aagai au e hagamaumau au muna.
96 Au gu gidee bolo mee danuaa alodahi e odi,
aagai au hainga e deai donu sono hagaodi.
Mem
97 Au e lodo mmao i au hainga!
Au e hagamaumau mee nei i taiao ga boo ai.
98 Au hainga e hai au ma e kii ange de heiangi i ogu hagadaumee,
i hiidinga e daakodo i ogu lodo i masavaa alodahi.
99 Au e heiangi ange i ogu dangada agoago alodahi,
go hiidinga au e hagamaumau au muna.
100 Au e kii ange dogu donu i denga daane maatua,
i hiidinga au e daudali i au muna gu hagasauaa.
101 Au e dee daudali i hegau baubau alodahi,
gi maua ai e au i de daudali i au muna.
102 Au tee tili donu au hagamodu,
go hiidinga koe gu agoago mai ai au.
103 Au muna e maimai i dagu mami ange,
gai e maimai ange i denga hooni!
104 Au muna gu hagasauaa ne hai ga kii ange dogu donu ange;
deelaa ai, au e kino i hegau baubau alodahi.
Nun
105 Au muna se laama e seesee ai au,
gai se mee e hagamaalama ai dogu haiava.
106 Au gu hai dahi hagatoo donu ma gu hagasauaa,
bolo au ga daohi au hagamodu heohi.
107 Tagi Maolunga, au gu duasala mmao;
daohia dogu mouli bei dagodo o au muna.
108 Tagi Maolunga, koe gi malangilangi i dagu sigidaumaha e tuhi ai goe,
gai agoagona mai au i au hagamodu.
109 Dogu mouli e hai ngadaa i masavaa alodahi,
aagai au e dee ngalo donu dau hainga.
110 Tangada baubau gu dugu dahi sele e dada ai au,
aagai au e dee hano gee donu i au muna gu hagasauaa.
111 Au muna go dogu boolonga donu ga hano ai,
gai e hagamalangilangi ai ogu lodo.
112 Au ne maanadu bolo au ga daudali i au hainga gu hagasauaa,
ga hano ai e dee ngado mai.
Samekh
113 Au e kino i gilaadeu e llodo lagolago,
aagai au e lodo mmao i dau hainga.
114 Go koe dogu mommee e mmuni ai, gai go dagu mee hungihungi;
dagu tali hagalodolodo go au muna.
115 De gau baubau, goodou hulo gee mai i ogu daha,
gai au ga daohi hainga a dogu Maadua.
116 Daohia gi dee baguu au bei dagodo dau hagatoo donu, gi mouli ai au,
gai gi dee se ngadi mee ai dagu tali hagalodolodo!
117 Daohia gi dee baguu au, gi ola ai au;
gai au ga hagadubu au hainga gu hagasauaa i laangi alodahi!
118 Koe e kino i gilaadeu alodahi e hagahaisala i au muna gu hagasauaa;
gai alaadeu hagatau hadu muna e deai olaadeu haigamaiana.
119 Koe e tili de gau baubau alodahi o henua i lalo bei denga gainga;
deenei ai, au e lodo mmao i au muna.
120 Dogu angaanga gu bolebole i dogu madagu i de goe,
gai au e madagu i au hagamodu.
Ayin
121 Au e hai hegau i de hagamodu soe ma de heohi;
koe gi dee dugua ange au gi gilaadeu e vaivai haia ngau.
122 Hagatoo donu ina ange gi doo dangada hai hegau dono duadonu;
koe gi dee dugua ange au gi de gau hagamaolunga gi vaivai haia.
123 Luoogu mada gu dalea mmao i de dagitilo de masavaa aau e hagaola ai,
ma de hai gi bei dau hagatoo donu heohi.
124 Koe gi hai hegau ange gi doo dangada hai hegau bei dagodo o doo abodonu,
gai agoagona mai au i au hainga gu hagasauaa!
125 Go au doo dangada hai hegau, haia gi dahi agu iloo,
gi donu ange ai au gi au muna.
126 Tagi Maolunga, gu dae mai de masavaa e hai ai au hegau,
go hiidinga gilaadeu gu oha au hainga.
127 Aagai au e kii ange dogu lodo i au hainga i dogu lodo
i goolo, aama goolo danuaa.
128 Gai au e hagadaba bolo au muna gu hagasauaa e heohi;
au e kino i de haiava dee heohi alodahi.
Pe
129 Au muna e hagalele mouli mmao;
deenei ai, au e daohi muna nei i ogu lodo.
130 De hhuge mai o au muna e gaamai de maalama,
gai e hai gi tonu ange gilaadeu e llodo ssenga.
131 Au e hhanga dogu ngudu e manavanava ai,
i hiidinga dogu lodo mmao i au hainga.
132 Huli mai ma gi abodonu mai gi de au,
bei doo abodonu ange laa gi gilaadeu e aaloha i doo ingoo.
133 Haia gi seesee au bei dau hai gu hagatoo donu ai;
koe gi dee dugua ange de baubau gi dagina ngau.
134 Hagaola ina mai au i de hagaduasala a dangada,
gai au ga daohi au muna gu hagasauaa.
135 Abodonu ange gi doo dangada hai hegau,
gai agoagona mai au i au muna gu hagasauaa.
136 Au e dangi ma de ssali ogu loimada,
i hiidinga dangada e dee daohi au hainga.
Tzadhe
137 Tagi Maolunga, koe e heohi mmao,
gai au hagamodu e heohi.
138 Koe gu hagasauaa au muna i de heohi
gai ni muna abodonu mee nei.
139 Ogu lodo gu honu i de lodo gaiaa,
i hiidinga ogu hagadaumee e dee anga ange gi au muna.
140 Au hagatoo donu ni muna abodonu,
doo dangada hai hegau e lodo ai mmao.
141 Au se dangada maolalo ma de kino ai o dangada,
gai au e dee ngalo donu au muna gu hagasauaa.
142 Doo heohi e dee ngado mai donu,
gai dau hainga ni muna abodonu.
143 Au gu hai ngadaa ma tee baba ogu lodo,
aagai dogu mee e malangilangi ai go au hainga.
144 Au muna e heohi ga hano ai;
haia gi donu ange au gi mee nei, gi mouli ai au.
Qoph
145 Tagi Maolunga, au e hagahi adu goe i ogu lodo alodahi;
basa mai gi dagu dangidangi, gai au ga daudali i au hainga gu hagasauaa.
146 Tagi Maolunga, au e hagahi adu goe, hagaola ina ngau,
gai au ga daohi au muna.
147 Au e oho age i mua de ao de mee e dangidangi adu i de bale;
dagu tali hagalodolodo go au muna.
148 Au e ala i denga masavaa dagitilo i de boo alodahi,
gai au ga hagamaumau ai au muna.
149 Hagalaangona dogu leo bei dagodo o doo abodonu,
Tagi Maolunga, daohia dogu mouli, bei dagodo o au hagamodu.
150 Gilaadeu e haia denga hagatau baubau e paa mai donu,
aagai gilaadeu e mmao gee i au hainga.
151 Aagai koe e dee mmao donu, Tagi Maolunga,
gai au hainga alodahi ni muna abodonu.
152 Au gu iloo huu au muna madagidagi loo,
gai koe ne hai gi daakodo au muna ga hano ai.
Resh
153 Galo mai diiloo dogu duasala, gai hagaola ina dogu mouli,
i hiidinga au tee ngalo donu au hainga.
154 Koe gi daalaa hagadonu ogu dagodo ma de hagaola dogu mouli;
daohia dogu mouli bei dagodo o au muna.
155 De hagaola e mmao gee donu i de gau baubau,
i hiidinga gilaadeu e dee hai hegau i au muna gu hagasauaa.
156 Tagi Maolunga, doo lodo aloha e laumalie mmao;
daohia dogu mouli bei dagodo o dau mee gu hagamodu.
157 E soa mmao gilaadeu e vaivai haia ngau ma de hai baasi mai gi de au,
gai au e dee hano gee donu i au muna.
158 Au e kino i gilaadeu e dee hai hegau i de mee abodonu,
i hiidinga gilaadeu e dee daudali i au muna.
159 Koe gi diiloo dogu lodo mmao i au muna gu hagasauaa!
Tagi Maolunga, daohia dogu mouli gi bei dagodo o doo abodonu.
160 Au muna alodahi ni muna abodonu;
au hagamodu heohi alodahi e daakodo ga hano ai.
Sin ma Shin
161 Denga dagi e hagaduasala ngau gai e deai donu hiidinga,
aagai au muna ni mee hagamaatagu mai gi de au.
162 Au e malangilangi i au muna,
bei dagodo o tangada e maua goloa lagolago i de hebagi.
163 Au e dee lodo ma de kino i muna hhadu,
aagai au e lodo mmao i dau hainga.
164 E hidu hanonga aagu e tuhi ai goe i de laangi,
i hiidinga o au hagamodu heohi.
165 Gilaadeu e malangilangi i au hainga e kona mmao de nnoho paba;
e deai donu se mee e hagabaakuu ina gilaadeu.
166 Tagi Maolunga, au e tali adu dau hagaola dogu mouli,
gai au e daudali donu i au hainga.
167 Au e daohi au muna,
go hiidinga au e lodo ai mmao.
168 Au e daohi au muna gu hagasauaa ma au muna,
go hiidinga koe e iloo ogu dagodo alodahi.
Tav
169 Tagi Maolunga, koe gi hagalaangona dogu dangi;
gai haia gi donu ange au bei dagodo o au muna.
170 Koe gi hagalaangona dagu dangidangi;
gai hagaola ina ngau bei dagodo o dau hagatoo donu.
171 Au gi kona mmao dagu tuhi goe,
gai koe e agoago mai au i au muna gu hagasauaa.
172 Dogu ngudu e daahili naa i au hainga gu hagasauaa,
go hiidinga au muna alodahi e heohi.
173 Hagadabena ange balea mai au,
go hiidinga au gu baba ange e daohi au muna gu hagasauaa.
174 Tagi Maolunga, au gu lodo mmao gi dae mai dau hagaola,
gai au e malangilangi i dau hainga.
175 Daohia dogu mouli, gai au ga tuhi ai goe,
gai au muna gu hagamodu gi balea mai au.
176 Au gu silivaahea saele bei dagodo o ssiibi gu dee maleva laa;
humai saalaa doo dangada hai hegau,
go hiidinga au e dee ngalo donu au hainga.
*119:83 gili manu hhao uvaini i lo te useahi: mee nei ni gili manu e hhao ai uvaini, gai gu daulooloa de daudau i honga de ahi, gai e tili i hiidinga gu baubau.