135
1 Duuhia Tagi Maolunga!*Duuhia Tagi Maolunga: de muna Hebrew go Hallelujah, diiloo hogi denga gubu e 3, 21.
Duuhia de ingoo o Tagi Maolunga;
goodou de gau hai hegau o Tagi Maolunga, duuhia ia,
2 goodou e hai hegau i lo te hale o Tagi Maolunga,
ma lo te buibui o de hale o taadeu Maadua.
3 Duuhia Tagi Maolunga, i hiidinga Tagi Maolunga e danuaa;
duuhia dono ingoo i taahili, i hiidinga se mee hagamalangilangi.
4 Tagi Maolunga gu hili Jacob gi se dangada niiona,
gai ne hai Israel go dono huaadangada hagamogomogo.
5 Au e iloo bolo Tagi Maolunga e maolunga,
gai taadeu Ia Aamua e maolunga ange i denga diinonga ange laa alodahi.
6 Tagi Maolunga e hai ono mee e malangilangi ai,
i de langi ma honga henua i lalo,
ma lo te dai aama mommee kelo alodahi.
7 Ia e hai denga hagausinga gi loage i de bido laa o henua i lalo,
gai ia e hai gi loomai denga uila madali de langi
ma de hagasao mai de madangi i dana mommee doange mee.
8 Ia ne daa ga maakau denga dama daane maatua o Egypt,
go dama daane maatua a dangada aama denga manu;
9 Egypt, ia ne hai denga sauaa ma mee hagalele mouli i honga doo henua,
ga hai baasi ange ai gi Pharaoh ma ono dangada hai hegau alodahi.
10 Ia ne hagadee kii denga huaahenua soa
ma de daa gu maakau denga hodooligi mmahi:
11 go Sihon, de hodooligi o de gau Amor,
ma Og, de hodooligi o Bashan,
aama denga nohoanga hodooligi alodahi o Canaan,
12 ga gaavange delaadeu henua e henua ai
ono dangada go de gau Israel.
13 Tagi Maolunga, doo ingoo e dagodo ga hano ai,
Tagi Maolunga, atangada alodahi e hagamaanadu doo ingoo.
14 Gai Tagi Maolunga e hagamodu naa bolo ono dangada e dee haisala,
ma de lodo aloha ange gi ono dangada hai hegau.
15 Diinonga o denga huaahenua e hai i goolo ma selevaa,
gai ni mee e hai i lima o dangada;*Psa 115.4-8; Rev 9.20
16 e hanu olaadeu ngudu, aagai e dee maua i de pasa,
e hanu olaadeu ganomada, aagai e dee gidee;
17 e hanu olaadeu dalinga, aagai e dee langona,
gai e dee maua hogi i de manamanava i olaadeu ngudu.
18 Dangada ne haia denga diinonga, e bei naa donu olaadeu dagodo,
gai e bei ai hogi gilaadeu e hagadonusia mee nei.
19 Dangada o Israel, hagadegi ina Tagi Maolunga;
de aamuli o Aaron, hagadegi ina Tagi Maolunga!
20 De aamuli o Levi, hagadegi ina Tagi Maolunga;
goodou e maatagu i Tagi Maolunga, hagadegi ina Tagi Maolunga!
21 Goodou hagadegi ina Tagi Maolunga i Zion,
de ia e noho laa i Jerusalem.
Duuhia Tagi Maolunga!