1 Tagi Maolunga, koe gu ssala ma gu iloo ogu dagodo.

2 Koe e iloo dogu noho gi lalo ma dogu hidi age;

koe e donu ange gi agu maanadu e dee galemu dogu mmao gee.

3 Koe gu gidee danuaa dogu seesee saele aama dogu dagodo iho,

gai koe e donu danuaa ange donu gi ogu dagodo alodahi.

4 Tagi Maolunga, i mua dagu tala dahi muna,

aagai koe gu iloo donu agu muna alodahi.

5 Koe e duuli mai ogu dua ma ogu mada i mua,

gai koe e dagi au i doo lima.

6 De iloo mee nei e gona odi de hagalele mouli mai gi de au;

gai e gona odi de maolunga, au e dee maua gi donu ange aagena.

7 Go hee naa donu oogu e hano e mmuni ai i doo Hagasaalunga?

Gai go hee naa donu oogu e savini e mmuni ai i de goe?

8 Noo au e hanage gi de langi, gai koe i kilaa;

noo au e hano iho gi de mommee o de gau maakau, gai koe i kilaa.

9 Noo au e lele ga hano gee i bakau o taiao,

ga hano ga noho i de baasi laa o tai,

10 aagai koe e dagi donu hogi au i doo lima i kilaa,

doo lima madau e poo au gi makaga.

11 Noo au e hagadaba, “Ni muna abodonu,

de gohu e haoli naa donu au,

gai de maalama i luoogu baasi gu gohu bei de boo,”

12 gai de gohu e dee maua donu i de hagagohu luoo mada;

de boo e maalama naa bei de laangi,

i hiidinga de gohu e bei de maalama i oo daha.

13 Koe ne hagadau mee i lo togu angaanga;

koe ne llanga dogu angaanga i lo te dinae o dogu dinana.

14 Au e hagaahe adu de abodonu gi de goe i dau hai ne hai ai au;

go hiidinga e hagamaatagu ma de hagalele mouli mmao,

au hegau e hagalele mouli mmao,

gai au e iloo donu de mee nei.

15 Koe e iloo mee alodahi o dogu angaanga,

i de masavaa aau ne hai ai au i de mommee lilo,

ma de masavaa oogu ne hagahale ai i mommee kelo hugadoo o henua i lalo;

16 luoo mada ne gidee mee ne hai ai dogu angaanga.

Laangi alodahi gu hagatau mai gi de au gu sisi i dau beebaa,

i mua de hagassula dahi mee nei.

17 De Maadua, au e hagamogomogo mmao au maanadu!

Gai e kona mmao de lagolago!

18 Noo au e dau gilaadeu,

gai gilaadeu e lagolago ange i denga gelegele dea.

De masavaa oogu e alahage ai,

gai au goi madali huu goe.

19 De Maadua, mee naa koe gi daia gi maakau de gau baubau,

gai de gau daa dangada gi hulo gee mai i ogu daha.

20 Gilaadeu e hagabaubau goe i alaadeu muna,

oo hagadaumee e hagangadi mee doo ingoo.

21 Tagi Maolunga, au e kino i gilaadeu e kino i de goe,

ma tee lodo mmao i gilaadeu e hai baasi adu gi de goe!

22 Gai dogu kino i gilaadeu e dee helui donu;

gai au e hagabinga bolo gilaadeu ni hagadaumee niiogu.

23 De Maadua, koe diiloo gi iloo ogu dagodo ma ogu lodo;

hagataalea ogu dagodo gi iloo ai dagodo o agu maanadu.

24 Diiloo be e hanu hegau baubau i ogu daha,

ma de dagi au i de haiava e deai sono hagaodi.