1 Tagi Maolunga, hagaola ina mai au i de gau baubau;

gai buibuia au i de gau alasala,

2 go gilaadeu e hagasaelea denga hagatau dee heohi i olaadeu lodo,

ma de damadaa de hebagi i masavaa alodahi.

3 Olaadeu alelo e hagamaakau bei de alelo o de labodo hagammau,

de mee hagammau i lodo olaadeu malaungudu.*Rom 3.13

4 Tagi Maolunga, buibuia loo au mai i ssauaa o de gau baubau;

gai hagaola ina au i de gau alasala e haia hagatau e hagabaguu ai au.

5 De gau hagamaolunga gu dugu dahi sele e dada ai au;

gilaadeu gu hhola delaadeu galauna i gaogao de haiava e dada ai au.

6 Au e hai ange gi Tagi Maolunga, “Go koe donu dogu Maadua.”

Tagi Maolunga, hagalaangona agu dangidangi!

7 Tagi Maolunga, go koe dogu Ia Aamua, gai go dogu Ia Hagaola mmahi.

Koe e buibui dogu biho i de goobai i de laangi e hai ai de hebagi.

8 Tagi Maolunga, aude dugua ange gi bei lodo o tangada baubau;

aude dugua ange gi ssula ana hagatau baubau!

9 Haia hegau baubau a dangada e hai baasi mai gi de au

gi aahe ange donu huu gi gilaadeu.

10 Haia gi malili iho denga maga ahi gi gilaadeu;

gai dilia ange gi lo te ahi, ma lodo geelonga iai bela pigi,

gilaadeu gu dee maua i de hiihidi age ange.

11 Haia de gau hai samu gi dee noho paba i honga de henua;

gai de hai ngadaa gi duu ange gi de gau alasala.

12 Au e iloo bolo Tagi Maolunga

e tala hagadonu dagodo o de gau hagaau aloha,

ma de hagamodu olaadeu muna olaadeu e duasala i de heohi.

13 Ni muna abodonu, gilaadeu e heohi e tuhi naa doo ingoo;

gilaadeu e nnoho naa i mada luoo mada.