1 Tagi Maolunga, au e hagahi adu goe; hagamoolau humai balea mai au.

Hagalaangona dagu dangidangi, i de masavaa aagu e hagahi ai goe!

2 Dagu dalodalo gi bei mee maanongi e dudu laa i oo mada i mua,

gai au gi haalo ina luoogu lima i talodalo bei ssigidaumaha i de ahiahi.*Rev 5.8

3 Tagi Maolunga, dagidiiloo mai agu muna e tala i dogu ngudu;

koe gi hagaloosi ina de abaaba o luoogu malaungudu.

4 Koe gi dee dugua mai au gi lodo e hai de mee dee heohi,

ma de hai de baubau madali gilaadeu e haia de baubau;

gai au gi dee gaina alaadeu gai mammami.

5 De hagaili a tangada heohi au, e bei donu dono abodonu mai;

dana hagasee au, e bei donu de lolo e hagasulu ai laa dogu biho;

gai au e dee hagaui gee ai donu.

Gai au e duudagi naa donu de dalodalo

e hai baasi ange ai gi dangada e haia de baubau.*De gubu e 5-7 e dee iloo danuaa de hagadoonunga i muna Hebrew.

6 Olaadeu dagi gu tili iho i de hadi aho,

gai gilaadeu e iloo naa agu muna, go hiidinga ni muna hagamalangilangi.

7 Omaadeu ivi gu maoha saele i gaogao denga daanunga,

bei de gelegele a dahi gu geli age laa.

8 Aagai luoogu mada e daumada goe Tagi Maolunga, dogu Ia Aamua;

au e mmuni i oo daha; aude dugua ange au gi de magau.

9 Hagaola ina mai au i sele a dangada gu dugu e dada ai au,

ma lodo sele a dangada e haia de baubau!

10 Haia de gau baubau gi too ange gi lodo alaadeu sele gu hagadabena mai gi de au,

gai au gu dee madagu i de seesee i kilaa.