146
1 Duuhia Tagi Maolunga!*Duuhia Tagi Maolunga: de muna Hebrew go Hallelujah, diiloo hogi de gubu e 10.
Dogu hagasaalunga, duuhia Tagi Maolunga.
2 Au e tuhi Tagi Maolunga i dogu mouli;
au e daahili tuhi ange gi dogu Maadua i taulooloa dogu mouli.
3 Koe gi dee tali hagalodolodo ange gi denga dagi o de henua,
aabe go dama a dangada, go dangada e dee maua i de hagaola goe.
4 De masavaa naa huu e odi ai dana manava,
gai ia e aahe ange gi de gelegele;
de laangi laa gai ana hagatau gu ni ngadi mee.
5 E manuuia tangada go de Maadua o Jacob dono bale,
gai dana tali hagalodolodo go Tagi Maolunga, dono Maadua,
6 go de ia ne haia de langi ma henua i lalo,
tai, aama mee alodahi iai.
Ia e hai hegau i de muna abodonu ga hano ai.*Acts 4.24; 14.15
7 Ia e hagamodu muna o olaadeu e vaivai haia i de heohi;
ma de gaavange gai a dangada e hiikai.
Tagi Maolunga e hagassao mai gilaadeu i lo te hale pono;
8 Tagi Maolunga e hai gi kide gilaadeu e dee kide;
Tagi Maolunga e hai gi daangage age gilaadeu e ino gi lalo;
Tagi Maolunga e aloha i gilaadeu e heohi.
9 Tagi Maolunga e dagitilo de gau henua gee;
ia e bale ange de hine gu magau dono bodu ma de gauligi gu deai sono damana,
aagai e hai gi dee ssula hagatau a de gau baubau.
10 Tagi Maolunga e hodooligi ga hano ai;
Zion, doo Maadua e hodooligi i denga atangada alodahi.
Duuhia Tagi Maolunga!