147
1 Duuhia Tagi Maolunga!*Duuhia Tagi Maolunga: de muna Hebrew go Hallelujah, diiloo hogi de gubu e 20.
E danuaa mmao de daahili tuhi ange gi taadeu Maadua;
e hagamalangilangi mmao ma de heohi taadeu tuhi ia!
2 Tagi Maolunga e hagaduu age Jerusalem;
ia e hagabuni mai de gau Israel gu nnoho laa i denga henua gee.
3 Ia e hagaieiangi naa gilaadeu gu daemaha olaadeu lodo,
ma de saabini olaadeu maanuga.
4 Ia e dau taelodo o denga heduu,
ma de hagahi ange dahi ma dahi i dono ingoo donu.
5 Taadeu Ia Aamua e maolunga ma de mmahi mmao;
gai dono donu ange e dee maua i de haide.
6 Tagi Maolunga e hagammahi gilaadeu e vaivai haia,
aagai e hagamaolalo de gau baubau.
7 Daahili ange gi Tagi Maolunga ma de hagaahe ange de abodonu;
hagadangidangi ange gi taadeu Maadua i de harp.
8 Ia e haoli de langi i denga hagausinga,
ia e hagadabena ange de langi gi honga de henua,
gai e hai gi ssomo denga helii i honga duuduu.
9 Ia e haangai ange denga manu lodo henua
aama dama a denga raven i delaadeu koo.
10 Ia e dee malangilangi i mahi o de hoosa,
aabe go luu vae mmahi o dahi dangada,
11 aagai Tagi Maolunga e malangilangi i gilaadeu e maatagu i de ia,
ma de tali hagalodolodo ange gi dono abodonu.
12 Jerusalem, hagaamua ina Tagi Maolunga;
Zion, duuhia doo Maadua.
13 Ia gu hai gi makaga baalanga hagamakaga o denga haitoga,
ma de hagamanuuia oo dangada e nnoho i kilaa.
14 Ia gu hai gi nnoho paba dangada i honga de henua,
gai gu hagaboobosu goodou i denga grain danuaa hugadoo.
15 Ia e hai gi loomai ana muna gi henua i lalo;
gai ana muna e moolau donu de hagassula.
16 Ia e gaamai denga snow tea bei huluhulu o denga ssiibi;
gai e hagassii saele denga snow bei de mama.
17 Ia e maga saele ana dibadibaa haisi bei denga hadu vaaligiligi;
goai e bau ange gi dana mee hagamagalili?
18 Ia e basa donu huu, gai gilaadeu gu vaivai;
ia e hai gi ssau mai dana madangi, gai denga vai gu ssali.
19 Ia ne tala ange ana muna gi Jacob,
ana muna gu hagasauaa aama ana hagamodu ange gi Israel.
20 Ia tee hai ange mee nei gi dahi huaahenua gee;
gai ana hagamodu, gilaadeu e dee iloo mee nei.
Duuhia Tagi Maolunga!